Vendet anëtare të BE-së ranë dakord me shumicë votash – të krijojnë një bazë ligjore për përdorimin e aseteve shtetërore ruse për Ukrainën, në mënyrë që të parandalojnë përgjithmonë kthimin e fondeve në Rusi, njoftoi presidenca daneze e BE-së. Kjo do të thotë që vende si Hungaria nuk do të jenë në gjendje të vënë veton ndaj vendimeve të ardhshme të sanksioneve të BE-së që parashikojnë ngrirjen aktuale të aseteve ruse të mbajtura në bllok.
Aktualisht, asetet ruse të mbajtura në BE janë bllokuar – sipas një mekanizmi sanksionesh – që duhet të rinovohet çdo gjashtë muaj – një marrëveshje që parandalon përdorimin e planifikuar të aseteve ruse për të financuar kredi afatgjata për Ukrainën.
Për të ngrirë asetet ruse për një kohë të pacaktuar, vendet anëtare po përdorin një nen ligjor – që lejon miratimin e masave të përshtatshme me shumicë të kualifikuar – të paktën 15 nga 27 shtetet e BE-së, që përfaqësojnë 65% të popullsisë së bllokut – në rast të vështirësive të mëdha ekonomike.
Sipas dokumentit ligjor, lufta e Rusisë kundër Ukrainës po shkakton sfida të rënda ekonomike.
Prandaj, transferimi i fondeve në Rusi duhet të parandalohet urgjentisht për të kufizuar dëmin në ekonominë e BE-së.
Rregullorja do të miratohet para një samiti të BE-së në Bruksel, javën e ardhshme.
Deri atëherë, mbështetësit e planit – përfshirë kancelarin gjerman, Friedrich Merz – shpresojnë të bindin kryeministrin belg, Bart De Wever për skemën e propozuar të kredisë.
Pa Belgjikën, ku pjesa më e madhe e fondeve ruse të destinuara për Ukrainën mbahet nga “Euroclear”, zbatimi i skemës konsiderohet jashtëzakonisht i vështirë.
“Euroclear” mban asete ruse me vlerë rreth 185 miliardë euro nga një total prej 210 miliardë eurosh.
Leave a Reply