Egjipti ka akuzuar kryeministrin izraelit, Benjamin Netanjahu, se po punon për ta penguar zbatimin e fazës së dytë të armëpushimit në Gaza dhe se po kërkon të nxisë tensione rajonale. Kreu i Shërbimit Shtetëror të Informacionit të Egjiptit, Diaa Rashwan, për kanalin shtetëror Al-Qahera tha se Netanjahu “me çdo mjet” po përpiqet ta shmangë kalimin në fazën e dytë të marrëveshjes së armëpushimit në Gaza, që hyri në fuqi më 10 tetor, duke ridrejtuar fokusin e SHBA-së drejt dosjeve të tjera rajonale, veçanërisht Iranit, Sirisë dhe Libanit.
Rashwan tha se kryeministri izraelit po përpiqet të nxisë tensione përtej Gazës duke shfrytëzuar marrëdhëniet e tendosura ShBA-Iran, me shpresën për ta tërhequr Uashingtonin në një përballje me Teheranin, gjë që do të mund të ringjallë luftimet në Gaza dhe të minojë fazën e dytë të marrëveshjes.
Ai tha se Netanjahu po manovron për ta bllokuar fazën e dytë të marrëveshjes për Gazën, por theksoi se ekziston një “veto e qartë amerikane” kundër rifillimit të luftimeve në Gaza. “Të gjithë treguesit konfirmojnë se administrata amerikane e ka përcaktuar qëndrimin e saj për nisjen e fazës së dytë në fillim të janarit”, tha Rashwan.
Ai shtoi se takimi i presidentit amerikan Donald Trump me Netanjahun më 29 dhjetor pritet ta shënojë pikënisjen praktike të fazës së dytë.
Rashwan e përshkroi Trumpin si “një njeri pragmatik që dëshiron ta përfundojë atë që e sheh si një zgjidhje historike”, duke shtuar se dokumenti i vetëm i politikës së jashtme këtë vit që mban emrin e Trumpit ishte plani i armëpushimit në Gaza, që sipas tij thekson rëndësinë qendrore të kësaj çështjeje për të.
Leave a Reply