Presidentja e Kosovës, Vjosa Osmani, ka deklaruar se Kosova qëndron fuqishëm përkrah Shteteve të Bashkuara të Amerikës dhe Presidentit Donald Trump, duke mbështetur veprimet e tyre kundër asaj që ajo e cilëson si “regjim narkoterrorist” në Venezuelë. Në një postim në platformën X, Osmani theksoi se presidenti Trump ka qëndruar në anën e popullit të Venezuelës, duke u përballur me regjimin e Nicolás Maduro-s dhe duke mbrojtur jo vetëm SHBA-në, por edhe pjesën tjetër të botës nga kartelet e drogës dhe krimi i organizuar.
“Populli i Venezuelës meriton liri, demokraci dhe një të ardhme të sunduar nga ligji, jo nga frika. Narkoterrorizmi dhe sundimi autoritar përbëjnë kërcënim për paqen përtej kufijve kombëtarë”, ka shkruar Osmani.
Edhe kryeministri në detyrë i Kosovës, Albin Kurti, ka deklaruar se Kosova mbështet operacionin anti-narkotik të Shteteve të Bashkuara të Amerikës në Venezuelë, i cili, sipas tij, udhëhiqet nga Presidenti amerikan Donald Trump. Në një mesazh mbështetës drejtuar SHBA-së, Kurti ka theksuar se mbajtja përgjegjëse e aktorëve shtetërorë të përfshirë në trafikimin e drogave është thelbësore për suksesin e luftës globale kundër narkotikëve.
“Republika e Kosovës mbështet operacionin anti-narkotik të Shteteve të Bashkuara të Amerikës, të udhëhequr nga Presidenti Donald Trump, në Venezuelë. Mbajtja përgjegjës e aktorëve shtetërorë të përfshirë në trafikimin e drogave është thelbësore për suksesin në luftën kundër kësaj dukurie”, ka deklaruar Kurti.
Leave a Reply