Në Tiranë është mbajtur sërish një protestë antiqeveritare, e cila është shoqëruar edhe me tensione e përplasje mes protestuesve e policisë. Protesta u organizua nga partia parlamentare opozitare “Shqipëria Bëhet”, sipas saj, për të denoncuar rastet e korrupsionit të zyrtarëve të lartë të qeverisë.
Qindra persona nga qytete të ndryshme të Shqipërisë, si dhe aktivistë kanë protestuar para selisë së Kryeministrisë në Tiranë. Sipas organizatorëve, me anë të protestës kërkohet dorëheqja e kryeministrit Edi Rama dhe krijimi i një qeverie tranzitore me “profesionistë të pavarur”. Sipas Partisë “Shqipëria Bëhet”, kryeministri Rama mbron publikisht zv/kryeministren dhe ministren e Infrastrukturës dhe Energjisë, Belinda Balluku, “pavarësisht fakteve dhe hetimeve për abuzime të rënda dhe keqpërdorim të fondeve publike”. Balluku është marrë e pandehur për veprën penale “shkelje e barazisë së pjesëmarrësve në tendera apo ankande publike”.
Protestuesit theksuan se duhet qeveri teknike me mandat 12-mujor për përgatitjen e zgjedhjeve të lira dhe demokratike. Në protestë u theksua se “gjysma e popullit ka ikur prej keqqeverisjes” dhe se “shqiptarët janë njerëz që meritojnë të jetojnë me dinjitet”.
Gjatë protestës u shënuan edhe tensione dhe përplasje mes protestuesve dhe forcave të policisë, pasi u pretendua se punonjës civilë të policisë po filmonin protestuesit. Përplasje pati edhe për vendosjen e një tende përpara selisë së qeverisë.
Organizatorët kanë paralajmëruar se protestat do të vazhdojnë, ndërkohë që edhe forca të tjera politike kanë njoftuar grumbullime përpara selisë së qeverisë.
Leave a Reply