Një fregatë e Marinës Gjermane u nis për t’u bashkuar me forcat e NATO-s që monitorojnë kalimet strategjike në Detin e Veriut dhe Detin Baltik, si dhe në Atlantikun e Veriut, mes tensioneve në rritje midis SHBA-së dhe Danimarkës mbi kontrollin e Groenlandës. m“Luftanija u largua sot pasdite nga porti Wilhelmshaven i Detit të Veriut me rreth 250 trupa në bord”, tha një zëdhënëse e marinës.
Anija do t’i bashkohet Grupit 1 Detar të Përhershëm të NATO-s (SNMG 1), një task forcë detare që përbëhet nga disa shkatërrues dhe fregata të vendosura nga aleatë të ndryshëm të NATO-s, si dhe një anije furnizimi.
“Misioni kryesor i fregatës në SNMG 1 do të jetë monitorimi dhe mbrojtja e rrugëve strategjike detare dhe infrastrukturës së rëndësishme në Atlantikun e Veriut, Detin e Veriut dhe Detin Baltik”, tha në një deklaratë Komandanti i Marinës, Wolfgang Eckmüller.
Anija u nis ndërsa tensionet po rriten për shkak të kërcënimeve të ripërtërira të SHBA-së për të aneksuar Groenlandën, një territor kryesisht autonom në Atlantikun e Veriut dhe ishulli më i madh në botë që është pjesë e Mbretërisë së Danimarkës.
Danimarka i ka kundërshtuar fuqimisht pretendimet e SHBA-se dhe u mbështet nga shtatë udhëheqës evropianë, të cilët shprehën solidaritet me Groenlandën.
“Groenlanda i përket popullit të saj. Është detyrë e Danimarkës dhe Groenlandës, dhe vetëm atyre, të vendosin për çështjet që kanë të bëjnë me Danimarkën dhe Groenlandën”, thuhej në deklaratën e nënshkruar nga udhëheqësit e Francës, Gjermanisë, Italisë, Polonisë, Spanjës, Britanisë së Madhe dhe Danimarkës.
Leave a Reply