Presidentja e Meksikës, Claudia Sheinbaum deklaroi se i ka bërë të qartë homologut të saj amerikan, Donald Trump, se prania e trupave amerikane në vend “nuk është në rendin e ditës”. Të dy udhëheqësit zhvilluan një bisedë telefonike pas deklaratave të Trumpit të enjten, ku ai përmendi mundësinë që Shtetet e Bashkuara të “ndërmarrin një sulm tokësor kundër karteleve të drogës”, veçanërisht në Meksikë.
”Unë i thashë ‘jo, kjo nuk është në rendin e ditës’, por ne vazhdojmë të bashkëpunojmë brenda kuadrit të sovranitetit tonë”, deklaroi Sheinbaum gjatë konferencës së saj të zakonshme për shtyp.
”Meksika është kundër ndërhyrjeve ushtarake”, i theksoi ajo presidentit amerikan, i cili e kishte pyetur për mendimin e saj lidhur me një ndërhyrje ushtarake të SHBA-së në Venezuelë dhe kapjen e Nicolas Maduros më 3 janar.
”Ai më pyeti se cili ishte qëndrimi ynë për Venezuelën; unë iu përgjigja se ky është qëndrimi zyrtar, se ne kemi një Kushtetutë, jemi kundër ndërhyrjeve ushtarake”, tregoi ajo.
Leave a Reply