Presidenti i Ukrainës, Volodimir Zelenski, tha se e ka udhëzuar ekipin e tij negociator të finalizojë dokumentin mbi garancitë e sigurisë nga ShBA-ja, me synimin që ai të dorëzohet për shqyrtim në “nivelin më të lartë”. “Kam udhëzuar që dokumenti mbi garancitë e sigurisë nga Shtetet e Bashkuara për Ukrainën të finalizohet dhe të paraqitet për shqyrtim në nivelin më të lartë. Ky duhet të jetë një dokument me rëndësi historike dhe teksti tashmë po e arrin atë nivel”, shkroi Zelenski në platformën amerikane X.
Pas një raporti të detajuar nga ekipi i tij lidhur me komunikimet me Uashingtonin, Zelenski paraqiti një agjendë për dy javët e ardhshme, e cila përfshin takime, përgatitje dokumentesh dhe nënshkrime të mundshme. Ai bëri të ditur se u janë dhënë udhëzime edhe kryeministres Yuliia Svyrydenko dhe zyrtarëve të tjerë të lartë për të siguruar vlerësim profesional të aspekteve ekonomike në marrëveshjet e ardhshme, përfshirë edhe marrëveshje trepalëshe mes Ukrainës, Evropës dhe ShBA-së.
Duke u përqendruar në paktin e sigurisë, Zelenskyy pranoi se pala amerikane është në kontakt me Rusinë lidhur me një kornizë politike për përfundimin e luftës.
“Ne e kemi përcaktuar vizionin tonë dhe duhet të ketë reagim të qartë nga Rusia – nëse ajo është e gatshme ta përfundojë luftën me kushte reale”, theksoi ai.
Leave a Reply