Kryeministri Edi Rama njoftoi se i është përgjigjur ftesës së presidentit amerikan Donald Trump, për të marrë pjesë në Bordin e Paqes për rindërtimin e Gazës. Kreu i qeverisë shprehu gatishmërinë e plotë për të kontribuar në lidhje me këtë përpjekje të rëndësishme dhe për t’u bërë tërësisht pjesë e një angazhimi të përbashkët që synon ta përkthejë vizionin në veprim.
Rama theksoi se Shqipëria qëndron me vendosmëri përkrah Shteteve të Bashkuara të Amerikës, në të gjitha përpjekjet për promovimin e paqes, sigurisë dhe angazhimit konstruktiv global. Rama nënvizoi se pret me interes që të kontribuojë në suksesin e misionit të Bordit të Paqes.
Kreu i qeverisë nënvizoi se “së shpejti angazhimi ynë do t’i përcillet Kuvendit të Shqipërisë për miratim”.
“Në një kohë kur konfliktet dhe përçarja dominojnë shumë shpesh panoramën ndërkombëtare, paqja duhet të formësohet aktivisht e jo të pritet pasivisht a diskutohet pafundësisht nëpër forume politike, teksa përreth globit jetë të pafajshme humbasin kotësisht çdo minutë. Bordi i Paqes shfaqet si mishërimi i kësaj domosdoshmërie urgjente”, shkruan Rama.
Leave a Reply