Departamenti i Drejtësisë i SHBA-së po publikon më shumë se 3 milionë faqe dokumente që lidhen me hetimin ndaj financierit të njohur të dënuarit për abuzim seksual, Jeffrey Epstein, njoftoi zëvendësprokurori i Përgjithshëm, Todd Blanche.
Gjatë një konference për media, Blanche tha se publikimi përfshin mbi 2.000 video dhe 180.000 fotografi, duke shtuar se administrata e presidentit Donald Trump ka prodhuar rreth 3,5 milionë faqe për t’i përmbushur kërkesat e Aktit të Transparencës mbi Dosjen Epstein.
Ky ligj, i miratuar nga Kongresi dhe i nënshkruar nga presidenti Donald Trump vitin e kaluar, kërkonte që Departamenti i Drejtësisë të publikonte gjithë materialin e paklasifikuar lidhur me hetimin e tij ndaj Epsteinit dhe bashkëpunëtores së tij të gjatë, Ghislaine Maxwell, deri më 19 dhjetor.
Blanche tha se fotografitë dhe videot e bëra publike përmbajnë “redaktime të rëndësishme” për t’i mbrojtur viktimat e krimeve të Epsteinit. “Ne redaktuam çdo grua të shfaqur në çdo fotografi apo video, përveç Maxwellit”, tha ai, duke shtuar se fotografitë e burrave u redaktuan vetëm kur ishte e nevojshme për të mbrojtur gratë.
Leave a Reply