Qindra mijëra protestues pritet të mblidhen në kryeqytetin bavarez gjatë Konferencës së Sigurisë në Mynih javën e ardhshme, kanë njoftuar autoritetet e qytetit. ”Deri tani, është regjistruar një numër i përgjithshëm prej rreth 120 mijë pjesëmarrësish për protesta”, bëri të ditur Zyra e Administratës së Qarkut të Mynihut.
Demonstratat e lidhura me këtë takim vjetor të liderëve botërorë dhe zyrtarëve të lartë të mbrojtjes dhe shërbimeve sekrete kanë tërhequr turma më modeste vitet e fundit. Deri dje ishin regjistruar gjithsej 21 aktivitete proteste në të gjithë Mynihun, që do të zhvillohen nga e mërkura deri të dielën.
Demonstrata më e madhe pritet të mbahet më 14 shkurt, kur kundërshtarë të autoriteteve drejtuese të Iranit pritet të protestojnë.
Organizatorët kanë deklaruar se kanë regjistruar deri në 100 mijë pjesëmarrës për këtë tubim. Një tjetër protestë kundër vetë konferencës është planifikuar po atë ditë në qendrën e qytetit, ku priten rreth 4 000 pjesëmarrës.
Kritikët e cilësojnë konferencën, që zhvillohet çdo shkurt në hotelin luksoz “Bayerische Hof” për të diskutuar çështjet më urgjente të sigurisë globale, si një takim botëror të militaristëve.
Janë planifikuar edhe tubime të tjera me rreth 3 000 pjesëmarrës secili, përfshirë protesta kundër luftës dhe një tubim që kërkon “zgjedhje të lira për vaksinimin”.
Konferenca e Sigurisë në Mynih do të mbahet nga 13 deri më 15 shkurt. Sipas organizatorëve, 65 liderë botërorë kanë konfirmuar pjesëmarrjen.
Leave a Reply