Rusia do të vazhdojë të zbatojë kufizimet e traktatit të fundit për armët bërthamore me Shtetet e Bashkuara të Amerikës, edhe pse ai skadoi javën e kaluar, për aq kohë sa Uashingtoni bën të njëjtën gjë, deklaroi sot ministri i Jashtëm rus, Sergej Lavrov. Traktati New START skadoi më 5 shkurt, duke lënë për herë të parë në më shumë se gjysmë shekulli pa kufizime dy arsenalet më të mëdha bërthamore në botë, çka ka rritur frikën për një garë të pakontrolluar armatimesh.
Presidenti rus Vladimir Putin kishte shprehur gatishmërinë për t’iu përmbajtur kufijve të marrëveshjes edhe për një vit tjetër, nëse SHBA-ja do të vepronte njësoj. Nga ana e tij, presidenti amerikan Donald Trump ka kërkuar përfshirjen e Kinës në një marrëveshje të re, kërkesë që Pekini e ka refuzuar.
Duke folur para deputetëve të Dumës, Lavrov theksoi se “moratoriumi i shpallur nga presidenti do të mbetet në fuqi për sa kohë që SHBA-ja nuk i tejkalon këto kufij”. Ai shtoi se Moska do të veprojë në mënyrë të përgjegjshme dhe të balancuar, duke analizuar politikat ushtarake amerikane.
Deklarata e Lavrov vjen pas raportimeve se negociatorë rusë dhe amerikanë kanë diskutuar në Abu Dabi mundësinë e një marrëveshjeje joformale për respektimin e kufijve të traktatit për të paktën gjashtë muaj. Zëdhënësi i Kremlinit, Dmitry Peskov, tha se çdo zgjatje e tillë mund të jetë vetëm formale, por konfirmoi se në Abu Dabi është diskutuar për kontrollin e ardhshëm të armëve bërthamore.
New START, i nënshkruar në vitin 2010 nga presidenti i atëhershëm amerikan Barack Obama dhe homologu i tij rus Dmitry Medvedev, kufizonte secilën palë në jo më shumë se 1 550 koka bërthamore dhe 700 raketa apo bombardues të dislokuar dhe gati për përdorim.
Marrëveshja parashikonte gjithashtu inspektime në terren për të verifikuar zbatimin, të cilat u pezulluan në vitin 2020 për shkak të pandemisë COVID-19 dhe nuk rifilluan më.
Në shkurt 2023, Putin njoftoi pezullimin e pjesëmarrjes së Rusisë në traktat, duke argumentuar se Moska nuk mund të lejonte inspektime amerikane në objektet e saj bërthamore në një kohë kur SHBA-ja dhe aleatët e NATO-s deklaronin hapur se synonin disfatën e Rusisë në Ukrainë.
Leave a Reply