Avokati: Thaçi të shpallet i pafajshëm për të gjitha akuzat

Avokati mbrojtës i Hashim Thaçit, Lluka Mishetiç, ka kërkuar shpalljen e pafajësisë për të gjitha akuzat e ngritura kundër klientit të tij.

“Ju lutem shpallni të pafajshëm Thaçin në të gjitha akuzat”, ka deklaruar ai. Mishetiç tha se ZPS nuk ka paraqitur prova që tregojnë kontribut të konsiderueshëm të të akuzuarve, në pretendimet e tyre për krime. “Standardi që ka Gjykata është që duhet të ketë një kontribut të konsiderueshëm për krimet në aktakuzë. ZPS për këtë nuk ka treguar asnjë provë”, tha ai.

Avokati mbrojtës i Hashim Thaçit, Lluka Mishetiç, deklaroi se nuk ka asnjë provë që klienti i tij ka kryer krime.

Mishetiq tha se Thaçi nuk ka dorë as në hartimin e shpërndarjen e komunikatave të UÇK-së.

“Konsensusi i provave dhe dëshmitarëve ndërkombëtarë dhe brenda UÇK-së ishte se Thaçi nuk dyshohej se ishte përfshirë në krime lufte apo në ndonjë politikë që shënjestronte kundërshtarët. ZPS nuk kishte përgjigje për të hedhur poshtë këto pretendime të hënën”, tha ai.

Mishetiç akuzoi Zyrën e Prokurorit të Specializuar se ka premtuar shumë, por që nuk ka gjetur prova për asnjë prej pretendimeve të tyre.