Parlamenti rus miratoi legjislacionin urgjent që i lejon agjencisë së shërbimeve sekrete vendase, FSB të urdhërojë operatorët e telekomunikacionit të bllokojnë lidhjet mobile dhe të internetit. Shërbimi Federal i Sigurisë i Federatës Ruse (FSB) është agjencia kryesore e shërbimeve sekrete, kundërzbulimit dhe sigurisë vendase, e krijuar në vitin 1995 si pasardhësja kryesore e KGB-së së epokës sovjetike.
Me qendër në Moskë, ajo menaxhon sigurinë kufitare, antiterrorizmin dhe mbikëqyrjen e brendshme, duke vepruar shpesh si një mjet i fuqishëm për sigurinë e regjimit. Duma Shtetërore, Dhoma e Ulët e parlamentit të Rusisë, miratoi tekstin e dytë dhe të tretë të amendamentit në ligjin e komunikimeve në një seancë urgjente.
Formulimi që kërkonte që vendime të këtij lloji të merren për të mbrojtur qytetarët dhe shtetin nga kërcënimet e sigurisë u hoq nga teksti përfundimtar.
“Në vend të kësaj, udhëheqja e vendit do të përcaktojë arsyet. Kjo i lejon presidentit Vladimir Putin, të urdhërojë mbylljen e internetit për të gjithë vendin ose për një rajon specifik”, thanë raportet.
Agjencia shtetërore e lajmeve TASS raportoi se ofruesit e telekomunikacionit celular do të lirohen nga përgjegjësia nëse klientët ankohen për bllokime.
Telekomunikacionet celulare tashmë janë mbyllur vazhdimisht, në rast të një kërcënimi nga dronët ukrainas pranë aeroporteve.
Amendamenti i ri do të hyjë në fuqi 10 ditë pasi të nënshkruhet nga Putini – gjë që shihet si një formalitet.
Kompetencat e FSB-së janë zgjeruar ndjeshëm nën udhëheqjen e Putinit, i cili dikur ishte kreu i shërbimeve sekrete.
Leave a Reply