Ish-princi britanik, Andrew Mountbatten-Windsor u arrestua sot me dyshimin për shkelje të detyrës zyrtare, sipas medias britanike. Policia konfirmoi arrestimin, pas akuzave të bëra kundër ish-princit pas publikimit të miliona faqeve me dosje që lidhen me financuesin pedofil Jeffrey Epstein. Policia shtoi më parë se po shqyrtonte akuzat se një grua ishte trafikuar në Mbretërinë e Bashkuar nga Jeffrey Epstein për të pasur një takim seksual me Andrew, dhe pretendon se ai kishte ndarë informacione të ndjeshme me pedofilin ndërsa shërbente si i dërguari tregtar i Mbretërisë së Bashkuar.
Emaile të publikuara nga Departamenti Amerikan i Drejtësisë sugjerojnë se ai ka përcjellë raporte mbi vizita zyrtare në Hong Kong, Vietnam dhe Singapor në fund të vitit 2010. Një prej mesazheve u dërgua vetëm pak minuta pasi ishte përgatitur nga këshilltari i tij i atëhershëm.
Sipas dokumenteve, Andrew e ka përfshirë Epstein edhe në një përmbledhje konfidenciale mbi mundësitë e investimit në rindërtimin e provincës Helmand në Afganistan, në prag të Krishtlindjeve të vitit 2010.
Graham Smith, drejtori ekzekutiv i grupit republikan “Republic”, tha se i ka raportuar këto pretendime Policisë së “Thames Valley”, duke i cilësuar si dyshime për keqpërdorim të detyrës publike dhe shkelje të sekreteve zyrtare.
Policia konfirmoi se ka marrë raportimin dhe se po vlerëson informacionin sipas procedurave të saj.
Hetimi vjen pas shqyrtimeve të tjera të fundit që lidhen me akuzat për marrëdhëniet e Andrew-it me Epstein.
Andrew, vëllai i mbretit Carls, ka mohuar më herët çdo shkelje lidhur me Epstein-in dhe ka deklaruar se ka ndërprerë kontaktet me të në dhjetor 2010.
Leave a Reply