Kancelari gjerman, Friedrich Merz nuk sheh gjasa për një përfundim të shpejtë të negociuar të luftës në Ukrainë, duke argumentuar se konflikti do të mbyllet vetëm kur njëra palë të jetë e rraskapitur ushtarakisht ose ekonomikisht. “Në vlerësimin tim, kjo luftë do të përfundojë vetëm kur njëra nga dy palët të jetë e rraskapitur, qoftë ushtarakisht apo ekonomikisht”, deklaroi Merz për gazetën “Rheinpfalz”, në një intervistë të publikuar sot.
“Arsyeja dhe argumentet humanitare nuk do ta bindin Putinin. Kjo është e vërteta e hidhur”, shtoi Merz duke iu referuar presidentit rus Vladimir Putin.
“Objektivi i përpjekjeve evropiane duhet të jetë që shteti rus të mos jetë më në gjendje ta vazhdojë luftën ushtarakisht dhe të mos mund ta financojë atë ekonomikisht”, shtoi ai.
Sipas vlerësimit të kancelarit, “klika e pushtetit rus” nuk mund të mbijetojë pa luftë në të ardhmen e parashikueshme.
“Duhet ta mbajë në funksion makinerinë e luftës, sepse nuk ka asnjë plan se çfarë të bëjë me qindra mijëra ushtarë, shpesh të traumatizuar rëndë, që kthehen nga fronti”, tha ai. Merz e përshkroi gjendjen aktuale të Rusisë me tone të ashpra se “aktualisht po shohim këtë vend në një gjendje barbarie të thellë. Kjo nuk do të ndryshojë në të ardhmen e afërt dhe është diçka me të cilën duhet të përballemi”.
Leave a Reply