Teksaa kryetari i Partisë Demokratike, Sali Berisha mbante fjalën në protestën e katërt kombëtare të opozitës përballë Kryeministrisë, mbështetës të PD hodhën fishekzjarrë dhe bomba molotov drejt godinës dhe policisë që kishte vendosur perimetrin e sigurisë. Forcat e policisë u bënë thirrje protestuesve për të ndalur veprimet e rrezikshme, ndërsa pas përpjekjeve për të qetësuar situatën, nisi përdorimi i ujit me presion për të shpërndarë turmën.
Molotovët janë fikur menjëherë ndërsa vijonte hedhja e tyre nga ana e protestuesve.
Berisha është larguar nga podiumi dhe është nisur në këmbë drejt Kuvendit dhe selisë së PD. Mbështetësit e opozitës u tërhoqën ndërkaq dhe vijuan protestën drejt Kuvendit, ndërsa u shpërndanë edhe në rrugë të ndryshme.
Tensionet vazhduan para Kuvendin, pranë Xhamisë dhe pranë selisë së Partisë Demokratike, ku për një kohë të gjatë protestuesit hodhën molotovë drejt policisë, ndërsa forcat e rendit u përgjigjën me gaz lotsjellës dhe ujë për largimin e njerëzve.
Gjithashtu, një numër protestuesish u ndaluan nga forcat e policisë, ndërsa Partia Demokratike hodhi akuza për përdorim të dhunës së ashpër.
Leave a Reply