Kryeministri Edi Rama deklaroi se vizita në Uashington për mbledhjen inauguruese të Bordit të Paqes përbën një nga momentet më të veçanta të javës, duke theksuar se Shqipëria mori pjesë si anëtare themeluese në një tryezë ku, sipas tij, po hapet një kapitull i ri në arkitekturën globale të sigurisë.
Në rubrikën “Shënimet e Javës” në Podkastin “FLASIM” – Episodi 7, Sezoni 6, Rama u shpreh se Shqipëria u ul me krenari në këtë tryezë ndërkombëtare, ndërsa konfirmoi edhe pjesëmarrjen e vendit tonë në forcën ndërkombëtare të stabilizimit në Gaza.
Kryeministri theksoi se fjala e mbajtur në emër të Shqipërisë pati jehonë, ndërsa përcolli edhe shqetësimin kombëtar lidhur me procesin gjyqësor në Hagë ndaj ish-krerëve të Ushtrisë Çlirimtare të Kosovës, përfshirë ish-Presidentin e Kosovës, Hashim Thaçi.
Rama u shpreh se ka besim që rritja e sensibilizimit ndërkombëtar për këtë çështje do të ndikojë në përgjegjshmërinë e trupës gjykuese. Sipas tij, deri më sot, akuza nuk ka arritur të provojë se UÇK-ja ka qenë një sipërmarrje kriminale, ndërsa kërkesa për dënime të rënda ndaj ish-udhëheqësve të luftës çlirimtare është e pajustifikuar.
Leave a Reply