Shërbimi Sekret i Shteteve të Bashkuara të Amerikës njoftoi se një person i armatosur u qëllua për vdekje pasi hyri në perimetrin e sigurisë së Mar-a-Lago, rezidencës dhe klubit privat të Donald Trump në Palm Beach, Florida. Presidenti Trump dhe zonja e parë, Melania, nuk ndodheshin në rezidencë gjatë incidentit; ata ishin në Shtëpinë e Bardhë në Uashington.
Identiteti i personit të qëlluar nuk është bërë ende publik. Sipas Shërbimit Sekret, ai u pa pranë hyrjes veriore duke mbajtur diçka që ngjante me një pushkë gjahu dhe një shishe me lëndë djegëse. Hetuesit raportojnë se i dyshuari ishte rreth 20 vjeç, nga Karolina e Veriut, dhe ishte raportuar i zhdukur disa ditë më parë nga familja e tij.
Ai udhëtoi drejt jugut duke marrë me vete një pushkë, e cila u gjet më pas në automjetin e tij.
Burri hyri me makinë përmes portës veriore të Mar-a-Lago në momentin kur një tjetër automjet po dilte dhe u përball me agjentët e Shërbimit Sekret, të cilët e qëlluan për vdekje.
Hetuesit po përgatisin një profil psikologjik për të kuptuar motivin e veprimit. Incidenti ndodhi rreth orës 1:30 të mëngjesit, me orën lindore të SHBA-së.
Ky rast vjen pas një seri sulmesh të mëparshme ndaj Trump, përfshirë një tentative atentati gjatë fushatës presidenciale në korrik 2024 në Pensilvani dhe një incidenti në shtator 2024 pranë fushës së golfit të tij, në West Palm Beach.
Leave a Reply