Kryeministri hungarez, Viktor Orban urdhëroi sot forcimin e mbrojtjes ushtarake dhe policore për infrastrukturën energjetike të vendit duke akuzuar Ukrainën se po planifikonte të ndërpriste furnizimet me energji të vendit të tij. Orban njoftoi këtë veprim në një mesazh video në Facebook, pas një takimi të Këshillit hungarez të Mbrojtjes, i cili përfshin përfaqësues të ushtrisë dhe shërbimeve sekrete.
Përveç kësaj, u vendos një ndalim për fluturimet me dronë pranë kufirit të përbashkët me Ukrainën në qarkun Szabolcs–Szatmar–Bereg.
“Shoh që Ukraina po përgatit veprime të mëtejshme për të ndërprerë operacionet e sistemit energjetik të Hungarisë. Për këtë arsye, kam udhëzuar që mbrojtja e infrastrukturës kritike të energjisë të forcohet”, tha Orban.
”Më shumë ushtarë dhe oficerë policie do të sigurojnë mbrojtje nga sulmet”, tha ai pa dhënë shifra.
Hungaria akuzon Ukrainën se bllokon transportin e naftës ruse përmes tubacionit ”Druzhba” dhe po refuzon të mbështesë vendimet e BE-së në mbështetje të Ukrainës derisa të rifillojnë operacionet.
Leave a Reply