Presidenti amerikan, Donald Trump, mbajti para Kongresit fjalimin e përvitshëm mbi Gjendjen e Kombit, pas një viti në drejtimin e Shtëpisë së Bardhë. Ai vlerësoi atë që e cilësoi si kthimin e Amerikës në “moshën e artë”, ndërsa preku një seri temash, nga zhvillimet e brendshme, deri të ecuria e krizave kryesore ndërkombëtare.
Trump vendosi rekord për fjalimin më të gjatë të “Gjendjes së Kombit” në histori, me një kohëzgjatje prej afro 1 orë e 50 minuta. Në fjalimin e tij, presidenti Trump theksoi vazhdimisht agjendën ekonomike, duke deklaruar se gjatë vitit të parë pas rikthimit në Shtëpinë e Bardhë, ai kishte mbikëqyrur një “rikthim historik” të ekonomisë amerikane. Trump deklaroi se kishte trashëguar një situatë të vështirë nga administrata e mëparshme, por se tashmë ekonomia amerikane “po rritet si kurrë më parë”. Ai theksoi rritjen e vendeve të punës dhe forcimin e tregut, duke ia atribuar këto zhvillime politikave të tij fiskale dhe tregtare.
Sa i përket tarifave, presidenti e cilësoi si “zhgënjyes” dhe “të pafat” vendimin e Gjykatës Supreme të SHBA kundër disa tarifave globale të vendosura vitin e kaluar. Megjithatë, ai siguroi se taksat do të mbeten në fuqi përmes bazave të tjera ligjore të miratuara dhe të testuara, duke theksuar se tarifat janë thelbësore për mbrojtjen e industrisë amerikane.
Në fushën e imigracionit, Trump përshëndeti atë që e quajti progres të ndjeshëm në uljen e imigracionit të paligjshëm dhe forcimin e kufirit jugor të SHBA-së. Ai nuk përmendi masat e diskutueshme të zbatimit të ligjit në disa shtete, të cilat sipas sondazheve nuk kanë gëzuar mbështetje të gjerë publike.
Sa i përket politikës së jashtme, presidenti i SHBA-së u ndal te Irani, duke theksuar se “preferenca ime është ta zgjidhim këtë problem përmes diplomacisë”, por paralajmëroi Teheranin kundër ndjekjes së një programi për armë bërthamore.
Trump i atribuoi merita vetes mbi operacionin amerikan për arrestimin e presidentit të atëhershëm të Venezuelës, Nicolás Maduro, në Karakas muajin e kaluar, duke theksuar se qasja e tij mbetet “paqja përmes forcës”.
Fjalimi u shoqërua me tensione të herëpashershme me demokratët në sallë. Megjithatë, ai nuk i kritikoi drejtpërdrejt gjyqtarët e Gjykatës Supreme, të pranishëm në seancë, lidhur me vendimin e tyre të fundit për tarifat.
Përgjigjen zyrtare të demokratëve e dha guvernatorja e Virxhinias, Abigail Spanberger, e cila deklaroi se presidenti “nuk ofroi zgjidhje reale për sfidat urgjente të kombit tonë”.
Fjalimi vjen në një moment kur sondazhet tregojnë rritje të skepticizmit të amerikanëve ndaj agjendës së tij për mandatin e dytë, në prag të zgjedhjeve të rëndësishme të mesmandatit që do të mbahen në nëntor.
Leave a Reply