Ish-sekretari i Thesarit të SHBA-së, Lerri Samers, ka njoftuar se do të tërhiqet nga mësimdhënia në Universitetin e Harvardit në fund të vitit akademik, mes reagimeve të vazhdueshme për lidhjet e tij me financierin e ndjerë dhe të dënuar për krime seksuale, Xhefrej Epstein. “Kam marrë vendimin e vështirë që të dal në pension nga mësimdhënia në Harvard në fund të këtij viti akademik”, ka deklaruar Samers.
Vendimi vjen pasi Komiteti i Mbikëqyrjes në Dhomën e Përfaqësuesve të SHBA-së publikoi dokumente që tregojnë për një korrespondencë personale të vazhdueshme mes Samers dhe Epstein. Deri më tani, nuk është paraqitur asnjë provë për keqbërje nga ana e tij.
Në nëntor, Samrs kishte ndërprerë angazhimet në mësimdhënie dhe kishte marrë leje nga pozita si bashkëdrejtor i Qendrës Mossavar-Rahmani për Biznes dhe Qeverisje, në kuadër të “Harvard Kennedy School”, pasi universiteti njoftoi se do të kryente një shqyrtim për personat e përmendur në dosjet e lidhura me Epstein.
Zëdhënësi i Harvardit, Jason Njuton, ka bërë të ditur se dekani i “Harvard Kennedy School”, Xheremi Ueinstein, ka pranuar dorëheqjen e Samers nga pozita drejtuese, ndërsa ai do të mbetet në leje deri në pensionimin e tij në fund të vitit shkollor.
Në nëntor, Samers ka dhënë dorëheqje edhe nga bordi i OpenAI, zhvilluesi i ChatGPT, pas njoftimit të Harvardit për rishikimin.
Leave a Reply