Media shtetërore iraniane ka konfirmuar se Udhëheqësi Suprem, Ajatollah Ali Khamenei, është vrarë në zyrën e tij gjatë sulmeve izraelito-amerikane ndaj Iranit, pas raportimeve të mëhershme nga zyrtarë amerikanë dhe izraelitë për vdekjen e tij. Për udhëheqësin e kahershëm iranian është shpallur një periudhë zie 40-ditore.
Konfirmimi i së dielës vjen pasi agjencitë iraniane Tasnim dhe Mehr kishin raportuar fillimisht se Khamenei mbetej “i palëkundur dhe i vendosur në komandimin e fushës”. Presidenti i SHBA-së, Donald Trump, shkroi në platformën e tij Truth Social se 86-vjeçari u vra në sulmet e përbashkëta SHBA-Izrael, të cilat nisën herët të shtunën. “Ai nuk ishte në gjendje t’u shmangej sistemeve tona të inteligjencës dhe ndjekjes shumë të sofistikuar dhe, duke punuar ngushtë me Izraelin, nuk kishte asgjë që ai, apo liderët e tjerë që janë vrarë bashkë me të, mund të bënin”, shkroi Trump. “Kjo është mundësia më e madhe e vetme që populli iranian të rimarrë vendin e tij. Shpresojmë që IRGC dhe Policia të bashkohen në mënyrë paqësore me patriotët iranianë”, shtoi ai.
Kryeministri izraelit, Benjamin Netanjahu, kishte deklaruar më herët se kishte “shenja në rritje” se Khamenei ishte vrarë. Agjencia Reuters, duke cituar një zyrtar të lartë izraelit të paidentifikuar, raportoi se trupi i Khameneit ishte gjetur.
Khamenei ka qenë Udhëheqës Suprem i Iranit që nga viti 1989, duke pasuar Ajatollah Ruhollah Khomeini, i cili udhëhoqi revolucionin iranian të vitit 1979.
Leave a Reply