Kryeministri Edi Rama komentoi ndryshimet e fundit në kabinetin qeveritar të komunikuara gjatë takimit të zgjeruar mujor të grupit parlamentar socialist. Në nisje të podkastit “Flasim”, Rama bëri të ditur se gjatë mbledhjes u bë një diskutim i detajuar nga deputetët mbi ecurinë e punës në një sërë sektorësh, për të cilët raportuan ministrat përkatës.
“Po ashtu, në mbledhjen e zgjeruar mujore të grupit, unë fola për raportet midis politikës dhe drejtësisë, në një fazë kur shumëçka pozitive është arritur, por kur shumëçka tjetër kërkon adresim”, shtoi Rama. Duke komentuar ndryshimet në qeveri, Rama tha se “në një aspekt këto ndryshime ishin të parapara”.
“Unë ndava me deputetet dhe deputetët edhe planin e ndryshimeve në qeveri, të cilat janë ndryshime që shkojnë në atë që unë e kam konsideruar si një qasje e re në këtë aspekt dhe për të cilën kam folur, qysh në fjalën e drejtuar Asamblesë Kombëtare në krye të punëve të këtij mandati, duke bërë edhe krahasimin, mes ndryshimeve në një skuadër futbolli me ato në një skuadër basketbolli. Kështu që, në këtë aspekt ndryshimet ishin të parapara”, shtoi ai.
Ndërkohë, Kryeministri theksoi se nëse rrethanat do të kishin qenë të ndryshme, nuk do të kishte ndryshuar për rezultatet e jashtëzakonshme në punë, zëvendëskryeministrja dhe ministrja e Infrastrukturës dhe Energjisë.
Por për këtë çështje, Rama tha se i mbetet e rezervuar e drejta që të flasë në mënyrë më shteruese, pasi të ketë lexuar edhe raportin e Këshillit të Mandateve.
Leave a Reply