Me zhvillimet dhe sfidat aktuale në Radio Televizionin e Kosovës, ushtruesi i detyrës së drejtorit gjeneral të RTK-së, Hysen Hundozi, e ka njoftuar delegacionin e DW Academy, Maxim Ryabkov, Manuela Römer, Hagen Schubert dhe Idro Seferi, që i priti në takim këtë të mërkurë. Gjithashtu, bëhet e ditur se është diskutuar për vazhdimin e bashkëpunimit.
Gjatë ditës, Hundozi, që ushtron detyrën e drejtorit gjeneral në RTK, ka pritur në takim edhe delegacionin e transmetuesit qendror publik në Bosnje dhe Hercegovinë, me të cilët kanë nënshkruar një memorandum bashkëpunimi. “Pas këtij takimi shumë konstruktiv dhe në një atmosferë të mirë, mirëpritëm edhe delegacionin e transmetuesit qendror publik në Bosnje dhe Hercegovinë, BHRT, Lejla Babovic e Rialda Ocuz, me të cilët gjithashtu nënshkruam një memorandum bashkëpunimi”, ka bërë të ditur, Hundozi.
Sipas tij, angazhimet e tilla kanë për qëllim forcimin e partneriteteve ndërkombëtare dhe hapin rrugë për zhvillim të mëtejmë të RTK-së.
Ndërkohë, një ditë më parë, drejtues të Radio Televizionit të Kosovës kanë marrë pjesë në konferencën ndërkombëtare “Next-Gen Media Expo 2”, organizuar nga Deutsche Welle, Goethe-Institut dhe Bashkimi Evropian.
Ushtruesi i detyrës së drejtorit gjeneral të RTK-së, Hysen Hundozi, ka deklaruar se ky aktivitet ishte një mundësi e mirë për shkëmbim idesh kreative dhe inspiruese, që, sipas tij, mund të konkretizohen në projekte bashkëpunimi në të ardhmen.
Hundozi tutje ka treguar se aty kanë nënshkruar një memorandum bashkëpunimi.
“Në margjinat e këtij eventi ndërkombëtar, patëm kënaqësinë të nënshkruajmë një memorandum bashkëpunimi me transmetuesin publik të Federatës së Bosnje dhe Hercegovinës, një nga entitetet e këtij shteti”, ka thënë ai.
RTK
Leave a Reply