Shtetet e Bashkuara të Amerikës kanë shpallur një “fitore të plotë” pas arritjes së marrëveshjes për një armëpushim dyjavor me Iranin, ndërsa ende mungon një reagim zyrtar nga Izraeli mbi zhvillimet e fundit. Shtëpia e Bardhë reagoi menjëherë pas njoftimit për armëpushim, duke e cilësuar atë një rezultat të drejtpërdrejtë të veprimeve ushtarake amerikane.
Zëdhënësja për shtyp, Karoline Keavitt deklaroi se kjo ishte një fitore për SHBA-në dhe për presidentin Donald Trump – duke theksuar se operacioni ushtarak kishte arritur objektivat e tij kryesore brenda 38 ditësh. Sipas saj, operacioni i koduar “Operation Epic Fury”, (Operacioni Zemërim Epik) – i planifikuar fillimisht të zgjaste katër deri në gjashtë javë, jo vetëm që u përmbush, por edhe i tejkaloi pritshmëritë, duke krijuar kushtet për negociata të vështira që çuan në një hap drejt zgjidhjes diplomatike dhe paqes afatgjatë.
Në vijim të zhvillimeve, sekretari amerikan i Mbrojtjes, Pete Hegseth gjenerali Dan Caine pritet të mbajnë një deklaratë publike për të dhënë më shumë detaje mbi operacionin dhe marrëveshjen.
Vetë presidenti Trump e cilësoi marrëveshjen si një “fitore totale dhe të plotë”, duke deklaruar në një intervistë se çështja e uraniumit të pasuruar iranian do të trajtohej në mënyrë të sigurt në kuadër të marrëveshjes, pa dhënë detaje konkrete.
Gjithashtu, ai sugjeroi se Kina mund të kishte luajtur një rol në nxitjen e Iranit për të hyrë në negociata, ndërsa konfirmoi se planifikon një vizitë në Pekin muajin e ardhshëm për t’u takuar me presidentin Xi Jinping.
Në një postim në rrjetin social “Truth Social”, Trump e quajti marrëveshjen një “ditë të madhe për paqen botërore”, duke shtuar se Irani dhe komuniteti ndërkombëtar janë të gatshëm për ulje tensionesh. Ai theksoi se SHBA-ja do të ndihmonte në menaxhimin e trafikut detar në Ngushticën e Hormuzit – një rrugë kyçe për tregtinë globale të energjisë.
Marrëveshja parashikon që për dy javë të lejohet kalim i lirë dhe i sigurt i anijeve në këtë korridor strategjik, duke ulur përkohësisht presionin mbi tregjet ndërkombëtare të naftës dhe transportit.
Leave a Reply