Komisioni Evropian, Franca dhe Gjermania nuk e fshehën kënaqësinë për humbjen e kryeministrit Viktor Orban, në zgjedhjet e përgjithshme parlamentare në Hungari.
Presidentja e Komisionit Evropian, Ursula Von Der Lejen, uroi fituesit e zgjedhjeve parlamentare në Hungari, duke theksuar se hungarezët zgjodhën Evropën. Presidenti francez, Emanuel Makron bëri thirrje për përpjekje drejt një Evrope më sovrane, pas zgjedhjeve parlamentare të Hungarisë duke përgëzuar udhëheqësin e opozitës Peter Magjar për fitoren e tij ndaj kryeministrit Viktor Orban. “Sapo fola me Peter Magjar për ta përgëzuar për fitoren e tij në Hungari!” postoi Makron në X. Ai tha se Franca mirëpriti “fitoren e pjesëmarrjes demokratike” dhe “angazhimin e popullit hungarez ndaj vlerave të Bashkimit Evropian”. “Le të ecim përpara së bashku drejt një Evrope më sovrane, për sigurinë e kontinentit tonë, konkurrueshmërinë tonë dhe demokracinë tonë”, shkruan Makron.
Edhe kancelari gjerman, Friedrih Merz ka përgëzuar pasardhësin e mundshëm të Viktor Orban si kryeministër i Hungarisë, menjëherë pasi populisti i krahut të djathtë pranoi humbjen në zgjedhjet parlamentare të së dielës. “Pres me padurim të punojmë së bashku për një Evropë të fortë, të sigurt dhe, mbi të gjitha, të bashkuar”, shkroi Merz në X drejtuar Peter Magjar, partia e të cilit e qendrës së djathtë Tisza duket se është në rrugën e duhur për të siguruar shumicën në parlament.
Gjatë kohës së tij në detyrë, Orban është akuzuar për ndërtimin e një sistemi gjysmautoritar, kufizimin e pavarësisë së medias dhe gjyqësorit, goditjen e të drejtave LGBTQ, drejtimin e vendit në konflikt me Bashkimin Evropian dhe afrimin e tij më ngushtë me Rusinë.
Leave a Reply