Presidenti i Turqisë, Rexhep Taip Erdogan dhe kryeministri i ardhshëm i Hungarisë, Peter Magjar kanë diskutuar të ardhmen e marrëdhënieve dypalëshe, si dhe zhvillimet rajonale dhe globale. Në një telefonatë, njoftoi Drejtoria e Komunikimeve e Turqisë, dy liderët shqyrtuan marrëdhëniet dypalëshe, ndërsa Erdoğan tha se lidhjet mes dy vendeve marrin forcë nga “historia dhe kultura jonë e përbashkët”, sipas një deklarate të drejtorisë.
Erdogan shprehu besimin se bashkëpunimi midis Turqisë dhe Hungarisë, si në nivel dypalësh ashtu edhe në platformat ndërkombëtare, do të vazhdojë të forcohet në ditët në vijim. Presidenti turk gjithashtu theksoi rëndësinë e forcimit të partneritetit ekzistues strategjik. Ai tha se dy vendet synojnë ta thellojnë bashkëpunimin dhe theksoi se aleanca e tyre në NATO, ku të dyja janë anëtare, kontribuon në “paqen rajonale dhe globale”.
Gjatë telefonatës, Erdogan gjithashtu e uroi Magjarin për suksesin e tij në zgjedhjet e së dielës.
Pasi partia Tisza e udhëhequr nga Magjar mori një epërsi të madhe në zgjedhje ndaj kryeministrit në largim, Viktor Orban, sipas zyrtarëve zgjedhorë, Orban e pranoi humbjen, duke u shprehur: “Do t’i shërbejmë kombit tonë nga opozita”.
Leave a Reply