Presidenti amerikan, Donald Trump deklaroi sot se ka urdhëruar Marinën amerikane të qëllojë për të eleminuar çdo mjet lundrues që vendos mina në Ngushticën strategjike të Hormuzit, një nga korridoret më të rëndësishme për transportin global të naftës. ”Kam urdhëruar Marinën e Shteteve të Bashkuara të eliminojë çdo anije, sado e vogël të jetë, që vendos mina në ujërat e ngushticës. Nuk duhet të ketë asnjë hezitim”, shkroi presidenti Trump në një postim në rrjetet sociale, duke shtuar se operacionet për pastrimin e minave po vazhdojnë me intensitet trefish.
Deklaratat vijnë një javë pasi ai kishte pohuar se Irani kishte nisur të hiqte minat detare, ndërsa tensionet u përshkallëzuan pas sulmeve të nisura nga SHBA-ja dhe Izraeli ndaj Iranit më 28 shkurt.
Në përgjigje, Teherani bllokoi efektivisht Ngushticën e Hormuzit dhe kërcënoi anijet që kalonin pa autorizimin e tij.
Kjo bllokadë shkaktoi ndërprerje të mëdha në tregtinë globale, rriti ndjeshëm çmimet e energjisë dhe detyroi vendet e varura nga importet të ndërmarrin masa urgjente për të shmangur mungesat e karburantit. Rihapja e ngushticës mbetet një pikë kyçe në negociatat për përfundimin e konfliktit, pas një armëpushimi dyjavor që nisi më 8 prill dhe që u zgjat në mënyrë të njëanshme nga Trump, ndërsa SHBA-ja vazhdon të mbajë në fuqi bllokadën ndaj anijeve që lidhen me Iranin.
Ndërkohë, Departamenti amerikan i Mbrojtjes njoftoi se forcat amerikane kanë sekuestruar një cisternë që transportonte naftë nga Irani në Oqeanin Indian, si pjesë e përpjekjeve për të ndërprerë rrjetet e paligjshme dhe për të kufizuar burimet financiare të Teheranit.
Leave a Reply