Ministri i Punëve të Jashtme i Spanjës, Jose Manuel Albares, ka bërë thirrje që Bashkimi Evropian (BE) ta ndërtojë kapacitetin e vet ushtarak, duke paralajmëruar se pasiguria mbi angazhimin e ShBA-së për sigurinë evropiane rrezikon të inkurajojë kundërshtarë si Rusia. Albares tha për Politico se Evropa nuk mund të përballojë më të mbështetet pa kushte në mbrojtjen e SHBA-së. “Nuk mund të zgjohemi çdo mëngjes duke pyetur veten se çfarë do të bëjë ShBA-ja më pas. Qytetarët tanë meritojnë më mirë”, tha Albares.
Komentet pasqyrojnë një ndryshim në rritje të tonit në kryeqytetet evropiane, teksa qeveritë po rivlerësojnë besueshmërinë e aleancës transatlantike mes tensioneve që lidhen me krizën iraniane dhe mundësinë e një mandati të dytë të presidentit amerikan, Donald Trump. Albares e përshkroi momentin aktual gjeopolitik si një pikë kthese për autonominë strategjike të Evropës.
“Ky është momenti i sovranitetit dhe pavarësisë së Evropës. Amerikanët po na ftojnë drejt kësaj. Duhet të jemi të lirë nga varësia. Të jesh i lirë nga varësia do të thotë të jesh i lirë nga shtrëngimi, qoftë kur bëhet fjalë për tarifa apo përdorimin e kërcënimit ushtarak. Dhe të lirë nga pasojat e vendimeve të dikujt tjetër”, tha ai.
Albares shprehu këmbëngulje se thirrjet për një kapacitet më të fortë mbrojtës evropian nuk duhet të shihen si përpjekje për ta dobësuar aleancën perëndimore.
“Ne kemi nevojë për një ushtri, për një kapacitet të përbashkët mbrojtës. ShBA-ja e ka forcuar ushtrinë e saj gjithnjë e më shumë dhe askush nuk mendon se kjo dobëson NATO-n. Nëse NATO-ja nuk po ofron më sigurinë që ofronte më parë, atëherë ne si evropianë duhet të bëjmë më shumë”, theksoi ai.
Leave a Reply