Ministrat e Financave të vendeve të G7-s kanë bërë thirrje për rihapjen sa më të shpejtë të Ngushticës së Hormuzit dhe për mbështetje ndaj vendeve që preken më shumë nga bllokada, deklaroi sot ministri francez i Financave, Roland Lescure, në përfundim të takimit të zhvilluar në Paris. “Po bëjmë thirrje për rihapjen e Ngushticës së Hormuzit. Po bëjmë thirrje për një zgjidhje të qëndrueshme të konfliktit,” u tha Lescure gazetarëve.
Sipas deklaratës përmbyllëse të takimit, konflikti në Lindjen e Mesme po ngadalëson rritjen ekonomike, po nxit inflacionin dhe po ushtron presion mbi zinxhirët e furnizimit me energji, ushqime dhe plehra kimikë. Ministri francez theksoi se vendet e G7-ës do të monitorojnë nga afër pasojat e krizës në bashkëpunim me organizatat ndërkombëtare, duke nënvizuar se Ngushtica e Hormuzit duhet të mbetet e hapur dhe e lirë nga tarifat.
Fondi Monetar Ndërkombëtar dhe Banka Botërore janë ftuar gjithashtu të zgjerojnë mbështetjen për vendet që mund të përballen me krizë ushqimore. “Nëse nuk veprojmë, 50 milionë njerëz mund të preken shumë shpejt nga një krizë ushqimore. Duhet të veprojmë”. paralajmëroi Lescure.
Rritja e çmimeve të plehrave kimikë dhe ushqimeve pritet ta vështirësojë sigurimin e ushqimit për popullsinë në vendet më të prekura gjatë javëve dhe muajve të ardhshëm.
Një plan veprimi për përballimin e situatës do të paraqitet në samitin e liderëve të G7-ës, që do të mbahet në mesin e muajit qershor në Evian.
Leave a Reply