Mijëra protestues u mblodhën në qendër të Beogradit për të kërkuar zgjedhje të reja parlamentare, duke synuar t’i japin një shtysë të re lëvizjes kundër korrupsionit që lindi pas shembjes tragjike të stacionit hekurudhor në Novi Sad në nëntor të vitit 2024. Që nga ajo ngjarje, protestat në Serbi nuk janë ndalur plotësisht. Lëvizja ka njohur periudha mobilizimi masiv, si protesta e marsit 2025 ku morën pjesë rreth 300 mijë persona, por edhe faza me pjesëmarrje më të ulët.
Studentët, të cilët morën shpejt drejtimin e protestave, shpresojnë se manifestimi i sotëm do ta ringjallë vrullin e protestës dhe do ta shtyjë presidentin Aleksandar Vuçiç të shpallë zgjedhje të parakohshme. Nën sloganin “Studentët fitojnë”, organizatorët u bënë thirrje qytetarëve të mblidhen nga ora 18:00 deri në 20:00 në sheshin ”Slavija”, në zemër të kryeqytetit serb, ku janë zhvilluar edhe protestat më të mëdha gjatë 18 muajve të fundit.
“Qëllimi i protestës së sotme është të mblidhemi sërish të gjithë bashkë dhe t’i tregojmë kujtdo se jemi ende këtu, se vazhdojmë të luftojmë dhe të punojmë dhe se nuk do të ndalemi”, tha Andjela, 24 vjeçe, studente e arkitekturës.
Një orë para nisjes së protestës, grupe qytetarësh po mbërrinin nga lagje të ndryshme të qytetit, të veshur me bluza me sloganin e ditës dhe duke mbajtur flamuj serbë ose flamuj të fakulteteve të tyre. “Po dërgojmë një mesazh të qartë: ndryshimi duhet të vijë. Serbia duhet të bëhet një vend demokratik, një shtet ligjor për të gjithë dhe të jetë pjesë e komunitetit demokratik evropian”, tha pensionisti Zoran Saviç.
Megjithëse protestat kanë qenë kryesisht paqësore, muajt e fundit janë shënuar incidente dhe përplasje sporadike.
Dhjetëra protestues kanë pretenduar se janë sulmuar nga persona të afërt me pushtetin.
Leave a Reply