Trump rrit kuotën e refugjatëve në SHBA për afrikano-jugorët e bardhë

Administrata e presidentit amerikan, Donald Trump njoftoi sot se do të pranojë edhe 10 000 afrikano-jugorë të bardhë, si refugjatë në Shtetet e Bashkuara të Amerikës gjatë këtij viti, duke rritur kufirin vjetor të pranimeve, ndërkohë që programi mbetet i mbyllur për refugjatët nga vende të tjera. Presidenti Trump pezulloi programin e refugjatëve, që në ditën e parë të mandatit të tij, ndërsa që prej asaj kohe administrata e tij e ka përdorur atë kryesisht për të lejuar hyrjen në SHBA të afrikanerëve – komunitet i afrikano-jugorëve të bardhë me prejardhje kryesisht nga kolonët holandezë.

Organizatat mbrojtëse të refugjatëve kanë kritikuar këtë qasje, duke theksuar se përqendrimi i një programi shumëvjeçar vetëm tek një grup i caktuar, ka lënë pa alternativa mijëra njerëz në mbarë botën, që largohen nga luftërat dhe konfliktet. Administrata amerikane pretendon se afrikanerët po përballen me përndjekje në Afrikën e Jugut, një akuzë që është hedhur poshtë nga qeveria në Pretoria.

Në njoftimin e publikuar sot në Regjistrin Federal, Trump deklaroi se për shkak të “një situate të paparashikuar emergjente refugjatësh” po rritet tavani i pranimeve. Ai fajësoi qeverinë e Afrikës së Jugut për “rritjen e fundit të nxitjes së dhunës me motive racore”, por pa dhënë detaje konkrete. “Pranimi në Shtetet e Bashkuara të Amerikës, i afrikanerëve nga Afrika e Jugut, në përgjigje të kësaj emergjence, justifikohet nga shqetësimet serioze humanitare dhe është në interesin kombëtar”, thuhet në deklaratën e Trump.

Sipas administratës amerikane, fillimisht ishte parashikuar që gjatë vitit fiskal, nga tetori 2025 deri në shtator 2026, të pranoheshin deri në 7 500 refugjatë, kryesisht afrikanerë.Megjithatë, javën e kaluar administrata informoi Kongresin për rritjen e kuotës në 17 500 persona, duke argumentuar se “zhvillime të paparashikuara në Afrikën e Jugut krijuan një situatë emergjente refugjatësh”.

Zëvendëssekretari amerikan i Shtetit, Christopher Landau, dhe zëvendëssekretari i Sigurisë Kombëtare, Troy Edgar, zhvilluan javën e kaluar, konsultime me komisionet përkatëse të Kongresit, si pjesë e procedurave të kërkuara me ligj.Sipas burimeve të njohura me takimin, Landau u tha ligjvënësve se, një nga format e përndjekjes ndaj afrikanerëve ishte edhe “fshirja e historisë së tyre nga tekstet shkollore”.