Qeveria britanike ka shpallur një paketë të re me 70 sanksione ndaj Rusisë, me synimin për të rritur presionin mbi Moskën, ndërsa kryeministri britanik Keir Starmer merr pjesë në samitin e G7-tës në Evian të Francës. Sanksionet synojnë “flotën hije” ruse, rrjetet e furnizimit për industrinë ushtarake dhe mekanizmat financiarë, që përdoren për të anashkaluar kufizimet perëndimore.
Mes objektivave është kompania fasadë, “Neptune”, e akuzuar nga Londra për sigurimin e teknologjisë perëndimore për shërbimet ushtarake ruse të inteligjencës, si dhe tre kompani dhe dhjetë zyrtarë të inteligjencës ushtarake ruse (GRU), të dyshuar për përfshirje në këto aktivitete.
Paketa përfshin gjithashtu disa anije që dyshohet se transportojnë gaz natyror të lëngshëm (LNG) rus, i cili është subjekt i kufizimeve ndërkombëtare. Me marrjen e masave të reja, numri i anijeve të sanksionuara të “flotës hije” dhe të transportit të LNG-së ruse, i kalon 600.
Sanksionet prekin edhe rrjete, që sigurojnë fshehurazi, teknologji perëndimore për ushtrinë ruse, si dhe furnizues në vende të treta, që ndihmojnë Moskën, të transferojë fonde në sistemin financiar ndërkombëtar. “Këto sanksione synojnë anijet, paratë dhe individët që mbështesin ekonominë e luftës së Rusisë dhe që kërcënojnë sigurinë evropiane”, tha Starmer.
Ai shtoi se vendet e G7-tës, do të vazhdojnë të rrisin presionin ndaj presidentit rus Vladimir Putin derisa, makineria e luftës së Rusisë të ndalet dhe paqja të rikthehet në Evropë.
Në të njëjtën kohë, kompania britanike e pasurimit të uraniumit “Urenco”, do të furnizojë për dy vjet me uranium të pasuruar, operatorin bërthamor ukrainas “Energoatom”, në kuadër të një marrëveshjeje, të mbështetur nga 210 milionë paund financim eksporti nga Britania e Madhe.
Leave a Reply