Autoriteti i Mediave Audiovizive, në bashkëpunim me Inspektoratin Shtetëror të Punës dhe Shërbimeve Shoqërore, kanë organizuar sot (e martë) një tryezë bashkëbisedimi, mbi kushtet aktuale të punës dhe krijimin e një mjedisi të sigurt, profesional, të drejtë dhe dinjitoz për të gjithë punonjësit e medias audiovizive.
Kjo tryezë është organizuar si aktiviteti i parë, i parashikuar në planin e punës, të miratuar nga të dy institucionet, pas nënshkrimit të Marrëveshjes së Bashkëpunimit mes AMA-s dhe Inspektoratit të Punës. Në tryezë merrnin pjesë përfaqësues të industrisë mediatike audiovizive, gazetarë dhe shoqëri civile.
“Sot sektori i medias në përgjithësi dhe ai audioviziv në veçanti, përballet me sfida të shumta”, tha në fjalën e hapjes, Kryetarja e AMA-s, Armela Krasniqi.
Krasniqi u shpreh se “përveç sfidave që ka sjellë zhvillimi i teknologjisë e kam fjalën edhe për një sërë problematikash, ndoshta të trashëguara nga e shkuara, që kërkojnë vëmendjen tonë dhe që lidhen me mungesën e garancive të mjaftueshme për kushtet e punës së gazetarëve”.
