Unioni Evropian i Transmetimeve (EBU), përmes një letre drejtuar institucioneve të Kosovës, konkretisht Kryeministrit dhe Presidentes së Kosovës, shpreh shqetësimin për gjendjen në RTK, dhe kërkon mbështetje të menjëhershme financiare për transmetuesin publik.
“Në emër të Unionit Evropian të Transmetimeve (EBU), që është aleanca më e madhe botërore e transmetuesve publikë, që përfaqëson mbi 100 transmetues në më shumë se 56 vende, dëshiroj të shpreh shqetësimin tonë të thellë dhe të kërkojmë urgjentisht mbështetjen e qeverisë suaj sa i përket krizës buxhetore që po e prekë Radiotelevizionin e Kosovës (RTK)”, shkruan Noel Curran, drejtor i Përgjithshëm i EBU-së, në letrën drejtuar institucioneve të Kosovës.
Që nga 1 Korriku, RTK do të funksionojë pa e marrë këstin e dytë të buxhetit të saj vjetor, për shkak të moskonstituimit të Kuvendit.
Edhe pse Kuvendi, sipas EBU, ka miratuar pjesën e dytë të buxhetit vjetor të transmetuesit publik, ende nuk janë shpërndarë fondet për RTK-në. “RTK ka dorëzuar të gjitha dokumentet e nevojshme me kohë tek institucionet relevante, përfshirë Parlamentin, Ministrinë e Financave dhe Thesarin, por RTK është ende në pritje të shpërndarjes së fondeve”, shpjegohet në letër.
EBU thekson se RTK luan një rol thelbësor kushtetues dhe demokratik, duke ofruar informacion të paanshëm dhe të vazhdueshëm për gjithë qytetarët e Kosovës, përfshirë komunitetet etnike dhe grupet më të ndjeshme. Në letër theksohet që RTK është një transmetues publik që vepron me përgjegjësi të lartë institucionale dhe transparencë të plotë financiare.
“E kuptojmë se konteksti politik aktual kufizon aftësinë e Kuvendit për të vepruar. Në këtë kuptim, RTK i është drejtuar zyrtarisht Qeverisë suaj, përfshirë Ministrinë e Financave, për ndërhyrje të menjëhershme institucionale dhe alokim të fondeve të nevojshme. Vendimi i Qeverisë për ta bërë këtë nuk do të krijonte precedent, pasi raste të ngjashme janë hasur në të kaluarën në rrethana të krahasueshme”, thuhet në letrën e EBU-së.
Nëse ky problem nuk zgjidhet deri në fund të korrikut, RTK nuk do të jetë në gjendje të përmbushë detyrimet e saj ligjore dhe financiare, përfshirë pagesën e pagave të stafit dhe angazhimeve kontraktuale.
“Kjo do të rezultonte në ndërprerjen e parë ndonjëherë të shërbimit për transmetuesin e vetëm publik në Kosovë. Një gjë e tillë do të kishte pasoja serioze për lirinë e medias, mbikëqyrjen demokratike dhe të drejtën e publikut për informacion të saktë dhe të pavarur. Kjo krizë është në kundërshtim të drejtpërdrejtë me detyrimet ligjore të Kosovës dhe standardet evropiane”, thuhet në letër.
EBU thekson faktin se RTK ka angazhuar në mënyrë aktive palët e interesuara kombëtare dhe ndërkombëtare lidhur me këtë çështje. Përfaqësuesit e RTK-së janë takuar me Ombudspersonin, i janë drejtuar presidentes dhe kryeministrit dhe janë në komunikim me përfaqësues të BE-së në Kosovë, si dhe me organizata të tjera ndërkombëtare për të kërkuar mbështetje.
“Në këtë kontekst urgjent, kemi besim se Qeveria juaj do të ndërmarrë hapa të menjëhershëm për të liruar fondet e nevojshme për të siguruar funksionimin e pandërprerë të RTK-së dhe për të mbrojtur standardet e qeverisjes demokratike dhe lirisë së medias, të cilat Kosova i ka marrë si pjesë e rrugës së saj evropiane”, thuhet në fund të letrës së EBU-së, të nëshkruar nga Noel Curran, drejtori i Përgjithshëm i Unionit Evropian të Transmetimeve.
RTK ka pyetur Qeverinë dhe Presidencën nëse e kanë marrë letrën e EBU-së dhe a e kanë trajtuar atë, por nuk kanë dhënë përgjigje. Gjithashtu përgjigja ka munguar nëse do të alokohet pjesa e dytë buxhetore me vendim të Ekzekutivit.
RTK
Leave a Reply