“Meta” ndalon reklamat politike në vendet e BE-së

Prej 10 tetorit 2025, kompania amerikane e mediave sociale “Meta” deklaroi se nuk do të lejojë reklamat me karakter politik, elektoral dhe social në vendet e Bashkimit Europian. Shkak i vendimit është legjislaciooni i pritshëm në vendet e BE-së.

“Meta”, që zotëron Instagram, Facebook, Threads dhe Whatsapp, bëri të ditur në një deklaratë se Rregullorja e Bashkimit Europian për Transparencën dhe Targetimin e Reklamave Politike “vendos sfida domethënëse dhe paqartësi ligjore”, si dhe “kërkesa të pazbatueshme”.

Rregullorja e BE, e njohur si TTPA, synon të luftojë manipulimin e informacionit dhe ndërhyrjen e huaj në zgjedhje. Ajo ka nisur të zbatohet prej prillit 2024, por disa pjesë të saj hyjnë në fuqi më 10 tetor 2025.