Nga Isidor Koti
Nëse ju kujtohet tërmeti i fundit në Shqipëri, askush nuk e priste, as viktimat dhe as pasojat e rënda që krijuan plagë të pambyllura ende sot, pothuajse gjashtë vjet më pas. Një krahasim që vlen për përqasje edhe me tregun imobiliar në vendin tonë, që është zhytur këtë periudhë në dilema, të ngjashme me turbulencat e avionit dhe me frikën e sprintit të tij në ngjitje, ose me zemrën në dorë kur zbret dhe çliron ankthin e pasagjerëve deri në momentin kur rrotat hapen plotësisht dhe prekin tokën.
Çmimet e pasurive të paluajtshme në Shqipëri, e sidomos në Tiranë dhe në zonat bregdetare kanë arritur nivele të paparashikuara, duke krijuar konfuzion në pyetjet që qarkullojnë dendur e kudo: Çfarë po ndodh? Ku do shkojë? A do ketë stabilitet? Janë tri pyetje që zor se i gjen përgjigje, pavarësisht se në media dhe në rrjetet sociale dalin ekspertë të vet-shpallur pronash që profetizojnë të ardhmen. Më kot tuten të nxjerrin konkluzione për të nesërmen, sepse askush nuk e di efektin anësor të këtyre turbulencave që kanë nisur të shfaqen.
Pse turbulenca? Konkretisht jemi para dy fakteve serioze që vlen të analizohen. Së pari, ka një ngecje të tregut të shitjeve dhe këtë e pohojnë nën zë edhe ndërtuesit, edhe agjentët imobiliarë. Ka ngecje sepse ka frikë të arsyeshme, ngaqë lëvizjet politike dhe ekonomike tregojnë pasiguri në patundshmëri. Shto këtu edhe remitancat që sa vijnë e ulen dhe emigrantët kanë nisur të mendojnë jo më të investojnë në Shqipëri, por të shesin pronat që kanë këtu dhe të investohen në vendet ku banojnë prej vitesh. Së dyti, flitet shumë për lekun e pistë që ka ardhur me tonelata anijesh në vendin tonë…të paktën kështu thuhet! Por analiza nuk e njeh thashethemin, zhbiron realitetin dhe e vërteta është që ky realitet tregon se betonizimi i miliona eurove nuk ka burim tjetër arsyetimi.
Si t’ju përgjigjemi njerëzve që na pyesin për pronat?! A do ulen apo do ngrihen çmimet? A do ketë skenar “spanjoll” apo “grek” të para disa viteve ku pronat u katandisën siç katandiset “kokoshi një thelë”? A do ndryshojë gjë rivlerësimi i janarit 2026, apo është thjesht një skenar qeveritar për të rritur buxhetin e shtetit? Ngado që të rrotullohesh, frika për rënie dhe shpresa për ngjitje ose më së paku stabilitet nuk do pushojnë. Megjithëkëtë, tregu është kërkesë – ofertë dhe vlen të besohet vetëm ky skenar në sistemin kapitalist ku aderojmë, pavarësisht se nuk ka rregulla të qarta dhe të kontrolluara . Për sa kohë që do funksionojë mirë ky binom dhe për sa kohë ka afeksion ndaj një vendi në zhvillim e sipër, patundshmëria nuk ka pse të pësojë tundje tërmeti.
Shkruar për “KomentON”
Leave a Reply