Dy zyrtarët më të lartë të Bashkimit Evropian i kërkuan sot Ukrainës të bëjë përpjekje të mëtejshme në luftën kundër korrupsionit, pasi parlamenti ukrainas miratoi ligjin që rivendos pavarësinë e dy agjencive antikorrupsion.
Presidentja e Komisionit Evropian, Ursula von der Leyen, dhe presidenti i Këshillit Evropian, Antonio Costa, thanë se nënshkrimi i ligjit të ri nga Zelensky ishte “një hap i mirëpritur”, në një postim të përbashkët në X.
“Reformat e shtetit të së drejtës dhe antikorrupsionit në Ukrainë duhet të vazhdojnë. Ato mbeten thelbësore për përparimin e Ukrainës në rrugën evropiane. BE-ja do të vazhdojë të mbështesë këto përpjekje”, shkruan ata.
Ligji i mëparshëm, i miratuar javën e kaluar, në mënyrë efektive e vendosi Byronë Kombëtare Kundër Korrupsionit dhe Zyrën e Prokurorit të Specializuar Kundër Korrupsionit nën autoritetin e prokurorit të përgjithshëm.
Duke reaguar ndaj votimit, një zëdhënës i Komisionit Evropian tha sot se parlamenti ukrainas kishte rivendosur masat kryesore mbrojtëse që sigurojnë pavarësinë e organeve kundër korrupsionit.
Ligji i ri rikthen pavarësinë e të dy autoriteteve kundër korrupsionit. Megjithatë, punonjësit me qasje në sekretet shtetërore do të duhet t’i nënshtrohen testeve të rregullta të detektorit të gënjeshtrave në të ardhmen.
Ata do të pyeten për bashkëpunim të mundshëm me Rusinë, e cila pushtoi Ukrainën rreth tre vjet e gjysmë më parë.
Të dy organet u krijuan në vitin 2015 për të luftuar marrjen e ryshfeteve dhe nepotizmin midis zyrtarëve të lartë shtetërorë dhe politikanëve.
Pas kërkesave të aleatëve perëndimorë, Ukraina ngriti një rrjet organesh për të luftuar korrupsionin.
“Pavarësisht kësaj, vendi mbetet një nga më të korruptuarit në Evropë”, sipas organizatës joqeveritare “Transparency International”.
Komisioni paralajmëroi sot Kievin se ligji i rishikuar “nuk është fundi i procesit”, ndërsa i nxiti autoritetet të vazhdonin të luftonin korrupsionin.
Leave a Reply