Me rastin e 50-vjetorit të Aktit Final të Helsinkit, ministri për Evropën dhe Punët e Jashtme, Igli Hasani, mori pjesë në Konferencën e Nivelit të Lartë “Helsinki+50”, të organizuar nga Ministria e Jashtme e Finlandës.
Aktiviteti shënoi gjysmëshekullin e dokumentit themelues të OSBE-së, një moment kyç në historinë e sigurisë evropiane dhe një pikë referimi për marrëdhëniet ndërkombëtare të bazuara në parime dhe rregulla.
Në fjalën e tij, ministri Hasani theksoi se parimet themelore të Aktit Final, përfshirë respektimin e sovranitetit, integritetit territorial, mospërdorimin e forcës dhe respektimin e të drejtave të njeriut, nuk janë thjesht norma historike, por udhërrëfyes të domosdoshëm për rendin ndërkombëtar sidomos në ditët e sotme.
“Shkelja e vazhdueshme e këtyre parimeve nga Federata Ruse përmes agresionit të saj ndaj Ukrainës përbën një sfidë të drejtpërdrejtë për besueshmërinë e OSBE-së”, deklaroi ministri Hasani.
Pikërisht në një mjedis të tillë, Hasani vlerësoi se “roli i OSBE-së si platformë për dialog dhe si mbrojtëse e parimeve të Helsinkit bëhet edhe më i domosdoshëm”.
Leave a Reply