Nga Elton METAJ
Në mënyrë intensive në mbledhjet e saj të fundit, qeveria shqiptare është angazhuar për përmirësimin dhe plotësimin e paketës së akteve nënligjore për funksionimin e industrisë ushtarake në vend. Një trajektore e re investimesh, që pritet të japë efekte pozitive, jo vetëm në fushën e sigurisë, por edhe atë ekonomike e sociale.
Së fundmi, në mbledhjen e 31 korrikut, ekzekutivi “Rama” miratoi kushtet e negociimit të kompanisë shtetërore të licensuar #KAYO, me shoqëri private në fushën e prodhimit dhe tregtimit të armatimit. Më konkretisht, synohet krijimi, në bashkëpunim me privatët, i një shoqërie aksionare të përbashkët për prodhimin dhe tregtimin e armëve të kalibrave të vegjël, të mesëm dhe dronëve.
Në këtë rast, vlera e investimit nga kompanitë private do të jetë jo më e ulët se 50 milionë euro, ndërsa do të sigurohen edhe linjat teknologjike të prodhimit ose montimit të armëve të kalibrave të vegjël, të mesëm dhe dronëve sipas nevojave operacionale të Forcave të Armatosura të Republikës së Shqipërisë dhe strukturave të tjera të sigurisë.
Në një vendim tjetër, vetëm tre javë më parë, #Kayo u autorizua të negociojë për prodhimin e municioneve të kalibrave të vegjël e të mesëm, duke siguruar nga privatët minimalisht një vlerë investimi jo më të ulët se 60 milionë euro në harkun kohor të 3 vjetëve. Gjithashtu do të garantohet punësimi i jo më pak se 80 punonjësve brenda 3 vjetëve, si dhe ofrimi i linjave teknologjike të prodhimit të municioneve të kalibrave të vegjël e të mesëm, sipas nevojave operacionale të Forcave të Armatosura shqiptare dhe strukturave të tjera të sigurisë.
Nuk do të mbetet jashtë kontratave, sigurimi i rrjetit të shpërndarjes së produkteve, në rast eksporti, dhe garancia se objekti i aktivitetit të shoqërisë tregtare, që do të krijohet, do të përmbajë prodhimin dhe tregtimin e municioneve për Forcat e Armatosura, si dhe municionet për përdorim nga strukturat e tjera të sigurisë.
Në të dy rastet, shteti shqiptar do të jetë kontributor me pasuri të paluajtshme, por duket se efekti ekonomik dhe jo vetëm, i një sipërmarrjeje të tillë, nuk do të jetë i vogël. Me qasjen e re për rigjallërimin dhe rikrijimin e industrisë ushtarake, Shqipëria do të sigurojë përfitime në disa drejtime:
Së pari, vendi ynë do të avancojë në mënyrë të shpejtë drejt plotësimit të kushtit për shpenzimin e 5 % të Prodhimit të Brendshëm Bruto për mbrojtjen. Ndonëse synimi duhet kapur deri në vitin 2035, për një vend që pret Samitin e Krerëve të Shteteve e Qeverive të vendeve të Aleancës në vitin 2027 do të jetë shumë e rëndësishme dëshmimi konkret i angazhimit, si një vend i vogël, por me vullnet të madh.
Së dyti, investimi në industrinë ushtarake do të përmirësojë kapacitetet e ushtrisë shqiptare në disa elementë të rëndësishëm dhe të forcave të tjera të sigurisë, pa pritur gjithçka nga importi. Kostot padyshim do të jenë më të ulëta dhe koha e sigurimit të “mallit” më e shkurtër. Mundësi shtesë do të krijohen nga eksporti i prodhimeve “Made in Albania”, teksa shtete si Ukraina, kanë nevoja emergjente për përballimin e agresionit rus.
Së treti, Shqipëria do të ketë një komponent të rëndësishëm në prodhimin kombëtar edhe industrinë ushtarake. Vetëm nga 2 projekte të miratuara në korrik 2025 do të investohen të paktën 110 milionë euro dhe do të angazhohen dhjetëra punonjës. Shtuar më tej edhe efektin e eksportit, përfitimet ekonomike e sociale do të jenë jo të vogla. Industria e luftës apo e mbrojtjes, siç na pëlqen ta quajmë me etikë politike e diplomatike, është fitimprurëse dhe kjo është tashmë e konfirmuar.
Megjithatë, përtej 3 përfitimeve në politikë, siguri dhe ekonomi, me industrinë e re ushtarake, Shqipëria e vogël, që dikur konsumonte siguri dhe tashmë e eksporton atë, do të rigjejë plotësisht krenarinë aq të domosdoshme për Forcat e Armatosura dhe sistemin e sigurisë. Pa pushtuar kurrë asnjë centimetër të një vendi tjetër, por disa herë të vendosur në zgjedhën e huaj, shqiptarët e dinë mirë vlerën e lirisë. Dhe për ta garantuar këtë liri duhet investim dhe krenari.
Leave a Reply