Dua Lipa ngjitet në skenën e “Sunny Hill” në Prishtinë

Ylli ndërkombëtar i muzikës, me origjinë nga Kosova, Dua Lipa, ka dhuruar një moment të veçantë në mbrëmjen e hapjes së festivalit “Sunny Hill” në Prishtinë, duke u ngjitur në skenë së bashku me babanë e saj, Dukagjin Lipa. Të dy performuan këngën “Era”, një nga këngët simbolike të kulturës shqiptare, e cila u prit me entuziazëm nga publiku.

Pamje nga kjo paraqitje i ka ndarë në rrjetet sociale ministri në detyrë i Kulturës, Rinisë dhe Sportit të Kosovës, Hajrulla Çeku. Në videon e publikuar nga ai, shihet Dua Lipa duke kënduar me emocion, përkrah babait të saj.

“Ku ka më mirë se në shtëpi. Dua jonë në Prishtinë”, ka shkruar Çeku në përshkrimin e postimit të tij.

Festivali “Sunny Hill” është kthyer në një nga ngjarjet më të rëndësishme kulturore në rajon, duke sjellë në Prishtinë artistë të njohur ndërkombëtarë dhe duke promovuar imazhin e Kosovës si një qendër e rëndësishme e kulturës dhe muzikës moderne.