Presidenti i Turqisë, Rexhep Taip Erdogan, ka firmosur dekretet për ndryshime në drejtimin e ushtrisë, mes të cilave edhe largimin e shefit të Shtabit të Përgjithshëm të Forcave të Armatosura, gjeneralit Metin Gurak. Ai do të dalë në pension për t’u zëvendësuar nga komandanti i Forcave Tokësore, Selçuk Bajraktaroglu.
Gjithashtu, ndryshime janë bërë edhe në Forcat Ajrore, Detare dhe Tokësore, pas mbledhjes së Këshillit të Lartë Ushtarak.
Vetë Presidenti Erdogan tha se, Turqia po ndërmerr hapa historikë për të mbrojtur të ardhmen e kombit. Ai foli përpara se të kryesonte një takim vjetor të Këshillit Suprem Ushtarak, raporton media turke.
“Lufta jonë për ta bërë Turqinë kombin kryesor në rajonin e saj brenda rendit global të riformësuar vazhdon, pavarësisht kurtheve të vendosura kundër nesh dhe sulmeve nga brenda dhe përtej kufijve tanë”, tha Erdogan duke lexuar një mesazh që shkroi në mauzoleun e Mustafa Kemal Atatürkut, themeluesit të Turqisë moderne, në një vizitë ceremoniale para takimit.
“Po ndërmarrim hapa historikë për të mbrojtur të ardhmen e kombit tonë, nga siguria te demokracia, nga ekonomia te teknologjia, nga industria e mbrojtjes te politika e jashtme”, shtoi ai.
“Ne besojmë se takimi i vitit 2025 i këshillit tonë do të jetë një moment i ri historik në rrugën drejt vizionit të Shekullit të Turqisë”, shtoi presidenti turk, në vizitën e tij të shoqëruar nga anëtarët e këshillit.
Erdogan i bëri gjithashtu homazh Atatürkut dhe të gjitha jetëve të sakrifikuara “për të ardhmen e tyre”.
Leave a Reply