Zëvendëskryeministrja dhe njëkohësisht ministrja e Infrastrukturës dhe Energjisë, Belinda Balluku, deklaroi sot se doganat janë një shtyllë kyçe drejt unionit doganor dhe integrimit në Bashkimin Europian.
E pranishme në një konferencë të drejtorëve të përgjithshëm të Doganave të Ballkanit Perëndimor dhe vendeve anëtare të BE-së, me temë “Partneriteti doganor për një Europë të lidhur – Thellimi i bashkëpunimit doganor CEFTA-BE për lidhje të pandërprera”, Balluku në fjalën e saj theksoi se procesi i zgjerimit të BE-së dhe integrimi i Ballkanit Perëndimor përbëjnë investimin më të rëndësishëm gjeopolitik të Bashkimit Evropian në këtë dekadë.
“Anëtarësimi në BE nuk ka të bëjë vetëm me zhvillimin ekonomik dhe prosperitetin, por me vlerat e përbashkëta evropiane që ndajnë popujt tanë” u shpreh ajo.
Synimi kryesor sipas saj është fokusi te masat konkrete për të lehtësuar tregtinë për bizneset, procedurat por edhe thjeshtimin e tyre përmes proceseve dixhitale.
Ajo u ndal të hapat konkretë për lehtësimin e bizneseve dhe tregtisë mes vendeve.
“Objektivat strategjike, politike të Komitetit Politik Evropian të mbajtur në Tiranë më 16 maj, pasohen në këtë takim të nivelit të lartë mes drejtuesve teknik të autoriteteve doganore të rajonit të BE, për të vendosur kolonat e bashkimit doganor me fokus tek siguria, lehtësimi i tregtisë së ligjshme dhe integrimi ekonomik drejt tregut të përbashkët evropian. BE është më afër se kurrë dhe është me fat të jesh në kohën e duhur dhe në vendin e duhur të këtij rrugëtimi të doganave shqiptare drejt unionit doganor evropian”, shtoi Balluku.
“Ne shqiptarët e dimë mirë se çfarë do të thotë të qëndrosh përpara një dere të mbyllur të një familjeje të madhe evropiane, pjesë e së cilës jemi në mënyrë natyrale. Jemi banorë autoktonë të zemrës së Evropës, mesdhetarë, si fqinjët tanë grekë e italianë. Shqipëria ndodhet sot në prag të certifikimit administrativ dhe zyrtar që do të mundësojë anëtarësimin e plotë në BE.”
Balluku theksoi se Shqipëria ka kaluar një të shkuar të vështirë, por ka treguar përkushtim të jashtëzakonshëm për të përmbushur detyrimet që kërkon anëtarësimi.
“Çdo institucion që bashkërendon punën me vendet e BE-së luan një rol kyç në rrugën tonë drejt anëtarësimit, dhe doganat janë pjesë e rëndësishme e strukturave shtetërore me detyra specifike në këtë proces”, theksoi zv/kryeministrja.
Bashkëpunimi doganor CEFTA-BE, sipas Ballukut, është një shtyllë strategjike, që merr formë përmes këtij takimi të nivelit të lartë mes drejtuesve të autoriteteve doganore të rajonit dhe BE-së.
Objektivi kryesor, theksoi më tej ajo, është ndërtimi i një unioni doganor funksional, që garanton siguri, lehtëson tregtinë e ligjshme dhe përgatit ekonomitë e rajonit për integrim të plotë në tregun e përbashkët evropian.
