Ballkanin Perëndimor është një partner strategjik i BE-së dhe se integrimi i vendeve të rajonit jo vetëm do të lehtësojë lëvizjen e lirë të mallrave por do të forcojë kufijtë dhe garantojë stabilitetin, bëri të ditur Drejtori i Agjencisë së Doganave dhe Monopoleve Italiane, Roberto Alesse, i cili theksoi rëndësinë e këtij bashkëpunimi.
Gjatë fjalës së tij në Konferencën e Nivelit të Lartë të Drejtorëve të Përgjithshëm të Doganave të Ballkanit Perëndimor dhe BE që po zhvillohet në Tiranë, Alesse nënvizoi përpjekjet për thjeshtimin e procedurave doganore, lehtësimin e kontrolleve dhe përforcimin e sigurisë kufitare.
“Doganat italiane dhe shqiptare kanë një traditë të gjatë dhe të fortë të bashkëpunimit. Në këtë kuadër shpreh bindjen se është e rëndësishme që të ritheksojmë angazhimin tonë për të mbështetur integrimin evropian të vendeve të Ballkanit. Konferenca e sotme na jep mundësinë që të ndajmë përvojat dhe diskutojmë mbi tema me interes të përbashkët si dhe të përcaktojmë strategjinë për të adresuar hapat e tjerë drejt zgjerimit të BE-së. Konteksti global në të cili jetojmë theksohet nga sfida dhe ndryshime të mëdha, dhe sot më shumë se kurrë bashkëpunimi ndërkufitar është i rëndësishëm për të lehtësuar një tregti të lirë ndërkombëtare dhe të mbrojmë kufijtë tanë. Janë lehtësuar kontrollet dhe thjeshtuar procedurat si dhe është përforcuar siguria kufitare”, tha ai.
Duke folur për sfidat globale, drejtori i përgjithshëm i doganave italiane, theksoi se bashkëpunimi ndërkufitar është më i rëndësishëm se kurrë dhe se në Planin e Rritjes për Ballkanin Perëndimor, doganat luajnë një rol kyç.
“BE ka përdorur instrumente të suksesshëm dhe ndihmë të konsiderueshme për harmonizimin e doganave me Ballkanin dhe BE ka miratuar Planin e Rritjes për rajonin ku përfshihet edhe lëvizja e lirë e mallrave, integrimi i zinxhirëve të industrisë dhe digjitalizimi i të gjitha fushave ku doganat luajnë një rol kryesor. Integrimi i këtij rajoni në BE, bazohet në vlera si besim dhe reciprocitete. Synimet tona janë të qarta: lehtësimi i tregtisë, rritja e besimit, garantimi stabilitet dhe paqes në këtë rajon strategjik”, tha Alesse
Në fokus të kësaj konference do të jetë pikërisht dhënia e impulse të reja për thellimin e bashkëpunimit doganor mes vendeve të Ballkanit dhe Bashkimit Evropian.
