Që nga fillimi i luftës në Gazë, janë vrarë 184 gazetarë palestinezë, sipas Komitetit për Mbrojtjen e Gazetarëve (CPJ) me qendër në Nju Jork, sipas AP.
Ata përfshijnë burra dhe gra, punonjës të pavarur dhe staf, veteranë me vite në terren dhe gazetarë të rinj në disa nga detyrat e tyre të para.
Disa gazetarë u vranë me familjet e tyre në shtëpi, të tjerë ishin në automjetet e shtypit, ose në tenda pranë spitaleve, ose duke mbuluar konfliktin.
Midis tyre ishin:
—Ayat Khadoura, 27 vjeç. E diplomuar në Universitetin Al Quds hodhi dritë mbi vështirësitë me të cilat u përballën familjet në javët e para të luftës. Ajo u bë e njohur për raportimin e bombardimeve që goditën lagjen e saj veriore të Gazës, duke përfshirë një video në të cilën ajo tha se forcat izraelite kishin urdhëruar banorët të evakuoheshin pak momente para se një sulm të godiste shtëpinë e saj dhe ta vriste atë në nëntor 2023.
— Hamza Dahdouh, 27 vjeç. Djali i shefit të Byrosë së Al Jazeera në Qytetin e Gazës, u vra në një sulm me dron në janar 2024 pas raportimit të një sulmi të mëparshëm në Gazën jugore. Ai ishte anëtari i pestë i familjes së tij që u vra.
—Fatima Hassouna, 25 vjeç. Fotoreporterja u vra në një sulm ajror izraelit në prill 2025, një ditë pasi një dokumentar rreth përpjekjeve të saj për të filmuar jetën e përditshme në mes të luftës në Gaza u pranua në një program të Festivalit të Filmit në Kanë që promovonte filma të pavarur.
— Hossam Shabat, 23 vjeç. Një gazetar i pavarur nga Gaza veriore, u vra ndërsa raportonte për Al Jazeera në mars të vitit 2025.
— Anas al-Sharif, 28 vjeç. Babai i dy fëmijëve u vra në një sulm izraelit në një tendë jashtë spitalit Shifa të dielën, disa ditë pasi ai qau në transmetim ndërsa raportonte për vdekjet nga uria në Gaza. Sulmi – i cili vrau edhe pesë gazetarë të tjerë – shkaktoi një valë dënimesh nga grupet e lirisë së shtypit dhe zyrtarët e huaj.
Izraeli ka akuzuar disa nga gazetarët e vrarë për përfshirje me grupe militante, përfshirë Hamasin dhe Xhihadin Islamik – akuza që gazetarët dhe mediat e tyre i kanë hedhur poshtë si të pabaza.
Shifrat dhe metodologjitë mund të ndryshojnë midis grupeve që ndjekin vdekjet e gazetarëve. Komiteti për Mbrojtjen e Gazetarëve -CPJ tha se po heton dhe verifikon në mënyrë të pavarur rrethanat pas çdo vdekjeje, duke përfshirë verifikimin e mungesës së përfshirjes së gazetarëve në aktivitete militante.
__ Sam Metz në Jerusalem dhe Fatma Khaled në Kajro kontribuan në raportimet e sulmeve izraelite.
ATSH
Leave a Reply