Nga Elton METAJ
Një delegacion i Kishës Ortodokse të Rusisë ishte në Tiranë për të takuar kreun e ri të Kishës Ortodokse Autoqefale të Shqipërisë, në një vizitë jo të zakontë po të mbahen parasysh marrëdhëniet mes dy shteteve. Tirana dhe Moska janë haptazi në marrëdhënie jomiqësore me njëra-tjetrën, thuajse armiqësore, ndikuar edhe nga zhvillimet në Ukrainë më tepër se 3 vitet e fundit. Por padyshim thelbi i ftohtësisë ruso-shqiptare mbetet #Kosova dhe pavarësia e saj, krahas qasjes euroatlantike të Tiranës.
Megjithëse çështjet fetare në Shqipëri dhe qëndrimi i komuniteteve zyrtare nuk ka lidhje dhe nuk përfaqëson qëndrimin shtetëror, ashtu siç ndodh në #Rusi e #Serbi, një vizitë e tillë nuk duhet anashkaluar. Për më tepër, kur vetë Kisha Orthodhokse Autoqefale e Shqipërisë e trajtoi atë me një deklaratë të kulluar dhe të qëruar nga emocionet, që do ta kishte zili edhe diplomati më i rafinuar.
Kisha njoftoi më 12 gusht 2025 se, “Fortlumturia e Tij, Kryepiskopi i Tiranës, Durrësit dhe gjithë Shqipërisë, Imzot Joani, priti një delegacion të Kishës Orthodhokse të Rusisë, të kryesuar nga Hirësia e Tij Andoni, Mitropoliti i VoloKolamskut, Kryetar i Departamentit për Marrëdhënie të Jashtme të Kishës së Rusisë. Gjatë takimit u shkëmbyen mendime mbi marrëdhëniet ndërorthodhokse, si dhe mbi tema të ndryshme që lidhen me dëshminë e Orthodhoksisë në botën e sotme. U vu theks i veçantë mbi çështjen madhore të paqes në Ukrainë, duke u theksuar gjithashtu nevoja për lutje, dialog dhe përpjekje të vazhdueshme për arritjen e saj”.
Me këtë deklaratë, pasardhësi i Janullatosit në Tiranë pranoi se gjatë takimit me “ministrin e Jashtëm” të Kishës së drejtuar nga patriarku Kirill është diskutuar për Ukrainën, pa përmendur në asnjë rresht Kosovën. Një mbështetës i zëshëm i Putinit, Kirill është shfaqur hapur si një propagandues dhe mbështetës i pushtimit rus të Ukrainës dhe i veprimeve të Beogradit.
Për më tepër, vetëm në prill të këtij viti, Putin dhe Kirill i dhanë një pritje të lavdishme Patriarkut të Kishës Ortodokse Serbe, Porfirije, i cili mbështeti “botën ruse”. “Qëndrimi ynë për Kosovën, Republikën Serbe dhe Malin e Zi, e konsideroj dhe e ndiej se varet edhe nga qëndrimi i Federatës Ruse në nivel global. Dëshira ime, dhe e shumicës në Kishën tonë, është që në të ardhmen, nëse ndodh një rigrupim i ri gjeopolitik, të jemi pranë atij rrethimi rus, në botën ruse”, tha Porfirije, i mbështetur edhe nga Kirill.
Në atë takim në Kremlin ishte i pranishëm edhe Hirësia e Tij Andoni, Mitropoliti i VoloKolamskut, kryetar i Departamentit për Marrëdhënie të Jashtme të Kishës së Rusisë. Pikërisht miku që priti kryepeshkopi #Joan në Tiranë. Ai i ka dëgjuar live në Moskë lavdet drejtuar Putinit për mbështetjen dhënë Serbisë ndaj Kosovës, Republikës Serbe dhe popullit serb në Mal të Zi. Të paktën kjo mund t’i kujtohej e përmendej në Shqipëri. Sepse për diçka rusët kanë qenë gjithnjë të qartë: Ata nuk e kanë ndarë kishën nga qëndrimi i Kremlinit. Dikush duhet t’ia kujtojë këtë edhe Hirësisë së Tij, Joan.
Leave a Reply