Shtëpia e Bardhë dhe Kremlini kanë konfirmuar orën e nisjes së takimit mes presidentëve Trump dhe Putin, të premten, 15 gusht, në Alaska. Ata do të shtrëngojnë duart në orën 11:30 të paradites (21:30 me orën e Shqipërisë), në Ankorazh, në bazën e ushtrisë amerikane “Elmendorf-Richardson”.
Lufta mes Rusisë dhe Ukrainës do të jetë në krye të axhendës, ndërsa stafet përkatëse kanë parashikuar që Trump dhe Putin të mbajnë një konferencë të përbashkët për shtyp pas konsultimeve. Bisedimet dypalëshe do të pasohen nga një drekë me delegacionet.
Nga pala ruse, në delegacionin e nivelit të lartë do të jenë ministri i Jashtëm Sergei Lavrov, ministri i Mbrojtjes Andrey Belousov, ministri i Financave Anton Siluanov dhe kryenegociatori i Kremlinit për Shtetet e Bashkuara të Amerikës, Kirill Dmitriev.
Nga pala amerikane ka konfirmim deri më tani për përfshirjen në delegacion të sekretarit të Jashtëm, Marko Rubio dhe të dërguarit special, Witkoff.
Takimi i së premtes në Alaska do të jetë përballja e parë mes dy udhëheqësve që nga marrja e detyrës nga Trump në janar 2025 dhe që nga nisja e pushtimit të plotë rus të Ukrainës nga Putini në shkurt 2022.
Leave a Reply