Radio Televizioni i Kosovës është ftuar të marrë pjesë në një projekt të ri ndërkombëtar, të financuar nga Bashkimi Evropian: “One Song, One Europe” (Një Këngë, një Evropë). Kosova do të do të përfaqësohet nga artisti Driton Bejta.
Ushtruesi i detyrës së drejtorit të përgjithshëm të RTK-së, Hysen Hundozi, ka njoftuar se në këtë projekt, muzikantë nga 12 vende të Evropës do të bashkohen për të interpretuar me instrumentet e tyre kombëtare veprën e famshme “Odë gëzimit” (Ode to Joy), e njohur edhe si himni i Evropës. Kosova do të përfaqësohet nga Driton Bejta, i cili me çifteli do të sjellë tingullin e veçantë të trashëgimisë sonë muzikore në skenën evropiane. Produksioni audiovizual do të realizohet në Shkup, më 15–16 shtator.
Pjesëmarrës do të jenë artistë nga: Gjermania, Çekia, Holanda, Franca, Bullgaria, Sllovenia, Shqipëria, Kosova, Maqedonia e Veriut, Bosnja e Hercegovina, Serbia dhe Mali i Zi. Ky bashkëpunim është një simbol i fuqishëm i një Evrope të lidhur, të larmishme, kreative dhe të bashkuar.
“RTK do të sjellë për publikun momentet më të bukura nga ky projekt: prapaskenat, intervistat dhe interpretimin final të veprës “Odë gëzimit”, duke treguar se kultura dhe kreativiteti i Kosovës janë pjesë e Evropës së bashkuar”, ka theksuar Hundozi.
Leave a Reply