Dokumentet që qarkulluan në Samitin e Alaskës mes delegacionit amerikan dhe atij rus përfshinin edhe një broshurë 7-faqëshe me detaje mbi axhendën, menunë e drekës së përbashkët që do të konsumonin të dy presidentët dhe stafet e tyre dhe dhuratën e Presidentit Trump për shefin e Kremlinit.
Dokumenti është hartuar nga Zyra e Shefit të Protokollit të Shtëpisë së Bardhë.
Dreka, që ishte parashikuar të konsumohej në Bazën e Bashkuar “Elmendorf-Richardson” në Ankorazh, ku u zhvillua edhe takimi Trump-Putin, do të jepej për nder të Presidentit të Rusisë. Ajo u anulua pas konferencës së shtypit dhe delegacionet u larguan nga #Alaska.
Në menu parashikohej që dreka do të niste me sallatë jeshile, shoqëruar me një përzierje të shampanjës, mustardës, mjaltit dhe kripës. Më pas ishte parashikuar të shërbehej fileto viçi, me një salcë me piper të zi dhe konjak. Filetoja do të shoqërohej me një gatim tradicional të Alaskës, një gjuhëz të grirë dhe të skuqur me qepë, verë të bardhë e gjalpë dhe të shërbyer me patate dhe asparagë të pjekur.
Dreka do të mbyllej me ëmbëlsirën e famshme “crème brûlée” (krem bryle – krem me sheqer të djegur), ndërsa broshura nuk ka asnjë të dhënë për pijet që do të konsumoheshin.
Të dy protokollet kanë shkëmbyer edhe dhuratat përkatëse. Shefi i Shtëpisë së Bardhë i ka dhuruar homologut të tij statujën e një shqiponje, simbol i stemës zyrtare të SHBA, për ta vendosur në tryezën e punës në Kremlin.
Leave a Reply