Koreja e Jugut dhe Shtetet e Bashkuara nisën të hënën stërvitjen e tyre të përbashkët për t’u përgatitur më mirë ndaj kërcënimeve nga Koreja e Veriut, e cila ka paralajmëruar se manovrat do të thellojnë tensionet rajonale.
Stërvitja 11-ditore ‘Ulchi Freedom Shield’, e dyta nga dy stërvitjet e mëdha që mbahen çdo vit në Korenë e Jugut, pas një tjetre në muajin mars, do të përfshijë 21.000 ushtarë, përfshirë 18.000 koreanë të jugut, në operacione të simuluara kompjuterike të komandës dhe në trajnime në terren.
Manovrat, të cilat aleatët i përshkruajnë si mbrojtëse, mund të nxisin një reagim nga Koreja e Veriut, e cila prej kohësh i paraqet stërvitjet e aleatëve si prova pushtimi dhe shpesh i ka përdorur ato si pretekst për demonstrime ushtarake dhe teste armësh që synojnë përparimin e programit të saj bërthamor.
Në një deklaratë javën e kaluar, ministri i Mbrojtjes së Koresë së Veriut, No Kwang Chol, tha se stërvitjet tregojnë qëndrimin e aleatëve për një “përballje ushtarake” me Veriun dhe shpalli se forcat e tij do të jenë gati të kundërpërgjigjen ndaj “çdo provokimi që shkon përtej vijës kufitare.”
‘Ulchi Freedom Shield’ vjen në një moment vendimtar për presidentin e ri liberal të Koresë së Jugut, Lee Jae Myung, i cili po përgatitet për një samit më 25 gusht me presidentin amerikan, Donald Trump, në Uashington.
Leave a Reply